Gubot pa sa lukot

Gubot gihapon ang pagpadagan sa kagamhanan sa Dakbayan sa Sugbo ubos sa administrasyon ni Mayor-Elect Edgardo Labella sugod karong Hunyo 30. Kini tungod kay dili man iyang kaalyado ang kadaghanan sa mga sakop sa City Council.

Alang niadtong mga wala kaayo makasabot sa isyu, ingon niini ang sitwasyon.

Ang Cebu City Council adunay 18 ka sakop, apil na ang duha ka konsehal nga nagrepresentar sa Sangguniang Kabataan ug Association of Barangay Councils.

Sa 18 ka sakop sa City Councils, 11 niini ang kaalyado sa Bando Osmeña Pundok-Kauswagan (BOPK) nga nagtamod sa  baruganan ni Mayor Tomas Osmeña, nga gipilde ni Labella sa eleksiyon kaniadtong Mayo 13.

Pito lang ang mga konsehal nga kaalyado ni Labella, ug ikawalo si Vice Mayor-Elect Michael Rama nga maoy molingkod isip presiding officer sa City Council, apan ang presiding officer dili makabotar kun adunay “voting” nga pagahimoon ang mga sakop sa konseho, gawas lang kun may “tie” sa botos.

Unsa may mahitabo? Kun mosugyot og mga legislative measures ang kampo nilang Labella ug Rama diha sa City Council, unya supakon sa mga konsehal nga kaalyado sa BOPK, dili gyud kini molampos kay gamay ra man sila.

Kun ang legislative measures isugyot sa mga alyado sa BOPK, aw mapalabang gyud diha sa konseho kay sila man ang majority, apan dili gihapon kini magmalampuson kun dili magustohan ni Labella. Ngano man?

Gilatid sa Republic Act 7160, kun Local Government Code nga ang mga ordinansa ug resolusyon gikan sa Konseho, kinahanglang aprobahan gyud sa mayor.

Ang mayor dunay katungod nga mo-vetoe, nga sa ato pa dili niya pirmahan ang wala niya magustohi nga ordinansa ug resolusyon. Apan ang balaod nagtugot usab nga ang vetoe power sa mayor, mahimo gihapon nga ma-override sa City Council aron ipakawalay bili ang vetoe sa mayor.

Apan …. ang pag-override sa vetoe power sa mayor magkinahanglan og labing menos, 2/3 votes gikan sa kinatibuk-an nga sakop sa City Council. Sa ato pa, kay ang City Council gilangkoban man og 18 ka sakop, kinahanglan nga ang mobotar aron i-override ang vetoe sa mayor, 12 botos.

Kay 11 ra man ka konsehal ang alyado sa BOPK, kinahanglang “manguyab” sila sa ubang alyado ni Labella ug Rama aron adto modapig kanila. Mahimo kaha na?

Karon pa lang gani daan nga wala pa makasugod si Labella pagka mayor, may mitug-an na kanako nga dunay mga kaalyado sa BOPK nga nagplano na nga mosuporta na lang sa administrasyon ni Labella.

Sa ato pa, gubot pa sa lukot ang mga isyu diha sa City Council ug panid-an lang nato kon unsay sangpotanan niining tanan.