Si Mamerto ug Natividad

May schedule ko sa parokya sa Danao City usa kadto ka gabii. Dunay mga patay nga akong misahan.

Ang una anaa sa Looc ang Ikaduha sa may Lapu-lapu. Ang ngalan sa taga Lapu-Lapu Danao mao si Mamerto apan sa dihang dayon nakong human sa Misa dunay laing niabot nga lungon ug sugo sa kamaukiton ako nangutana kun kinsa tong pataya.

Asawa diay siya ni Mamerto ang gimisahan niadtong taknaa. Si Mamerto otsenta kapin na samtang si Natividad setenta kapin.  Namatay ang asawa pila ka adlaw human namatay ang bana.

Dunay nakaingon sa kilid nako nga kining hitaboa mao man ang hulagway sa gitawag nilang forever kay nag-unong gihapon bisan diha sa kamatayon. Subo man tuod ning palandungon apan sa akong personal nga panahom maayo ra pud.

Ang bana tingali naguol kay basin ang asawa dili maatiman mao nga mas maayo pang kuhaon  na lang. Ang asawa pud tingali sa laing bahin ang wala makadawat ning maong hitabo mao nga mas maayo na lang pud alang kaniya ang mosunod sa iyang mahal nga bana.

Bisan ang kamatayon makahuloganon lang sa gihapon. Ang kamatayon dili diay tuldok kun period. Ang kamatayon maoy ganghaan alang sa laing anib sa pagkinabuhi diha sa kahangturan. Hinuon ang kinabuhi sa tawo daw sama sa usa ka binhi nga kun alimahan pag-ayo moturok kini ug molambo matud pa sa awit nga tinagik ni Narcisa Fernandez.

Ang tanan dunay kinutoban mao nga angayan natong tagamtamon kun unsay naa sa karon ug atong hatagan og makahuloganong pag-atiman ang matag kinabuhi sa usag-usa kanato. Anugon ang panahon kun moabot ang higayon nga wala kitay gihimo aron mas mapalambo ug mapahugot ang kada usa.

Daghanan karon ang nahimong pabor sa bisan unsang disposable. Mao nga kun dili na gani magkauyon buwag na lang gyud dayon. Lisud kayo kun wala ang komunikasyon. Dili man tuod hingpit ang relasyon nilang Mamerto ug Natividad apan tingali sa katapusan nihukom silang magpabilin nga kuyog hangtud sa kamatayon.

Nagpakita lamang kini nga ang tanan nag-agad ra gyud sa desisyon sa tawo. Ang akong panghinaut nga bisan pa man kun nadugay ko og abot sa ilang haya tungod sa akong gilay-on, unta pud didto sa langit magkuyog silang moatubang sa Ginoo aron ila kong iampo.

Pahulay nga dayon ihatag kanila o Ginoo ug ang imong kahayag modan-ag kanila hangtud sa kahangturan. Amen