Pagtahud

Dunay nagmisa sa usa ka kapilya sa bukid. Ang pari aron kunohay aron maka-relate sa lisud nga kahimtang ang nagbiste lang og sako sa harina. Apan wa lang siya masayud nga ang mga tawo nasakitan sa iyang gibuhat kay alang sa mga lumulupyo usa kini ka dakong insulto sa ilang malisud nga kahimtang. Matag tawo nagkinahanglan og pagtahud bisan kinsa ug bisan asa. Apan usahay dili ikalimod nga sa atong naabot nahimo kitang daw mga tawo nga nahikalimot nga sama sa uban kita pud nagtunob sa yuta diin kita gikan.Daghan sa mga tawo nga tungod sa kauhaw sa tumang pagtahud ang nahimo naman nuong motamak sa uban.

Tungod ba kaha kay nakamenos sa ilang kahimtang o aron sila ang anaa sa pedestal nga angayang hangdon sa kadaghanan. Dunay mga selective few nga nagtuo nga sila mga elitist. Assuming nga mas gwapo o mas gwapa pa kaysa uban. Ang naghinobrang pagtan-aw sa kaugalingon maoy nakapahimo nimong buta sa kamatuoran nga dunay mas labaw pa kay kanimo kamatuoran nga dinhi sa kalibutan anaa gyud ang gitawag og power differential.

Sama sa sakyanan diha sa karsada kun gagmay nga sakyanan dili ka maayo nga magpatunga kay kini makadaut ug makalaglag sa nagmaneho sa maong sakyanan. Apan ang dako nga sakyanan walay pagtugot nga basta- basta lang mobangga sa mas gagmay pa kay kaniya kini tungod kay mahimong maalaut ang bisan kinsa nga iyang hidam-agan. Kini ang tinud-anay nga kahulogan kun maghisgot kita og pagtahud. Nitahud ta tungod kay:

1. Nakita nato ang bili sa atong gitahud magamhanan man siya o dili inila man siya o timawa.

2. Atong gitahud ang atong kaugalingon mao nga motahud gyud ta sa uban.

3. Nagtuo kita sa Golden Rule. Dili kita buot nga buhaton ngari nato ang atong buhaton sa uban. Sa ato pa, naningkamot kita sa paghimo og maayo sa pamasin nga makaani pud kita og maayo kay usahay ang mga tawo dili maantigong mobugti sa kaayo nga imong nahatag.

4. Ang tawo nga motahud nakaila og Dios diha sa iyang kinabuhi kay ang Dios bisan pa man kun gamhanan kaayo ang wala magdumili paghatag sa iyang pagtahud sa atong kagawasan nga tungod niini wala gyud siya mamugos.

5. Ang maantigong motahud tawo maoy dunay tinuod nga kaalam. Dili garantiya ang  edukasyon aron ka motahud sa uban. Dunay nangangkon nga taas sila og kahibalo apan di gani maantigong mohatag bisan diyotay lang nga respeto.

Sayop ang akong impresyon sa maong tawo abi man gud nako siya barumbado apan bisan pa diha sa iyang kayano ug sa iyang kahubog maantigo gihapon siyang motahud bisan pa man kun sa tinuod lang sabaan siya nga pagkatawo.