Wanted Bombero Serbisyo

Sa mga gusto’ng moserbisyo, adunay dakong kahigayonan nga matuman ang inyong tinguha nga moalagad sa katilingban pinaagi sa Bureau of Fire Protection BFP Region 7.

Mokapin sa 250 ka mga bakanteng pwesto ang bukas alang sa mga aplikante nga mamahimong bombero.

Bukas alang sa tanang kurso, apan mas advantage kuno karon ang mga engineering ug accounting graduate.

Kini tungod kay preparasyon usab sa modernization sa BFP nga gikinahanglan usab ang katakos niini sa pwesto diin sila ipang destino.

Sa mga lalaking aplikante 5’4” ang height, samtang sa mga babaye 5’2” usab ang gitas-on.  Apan mamahimo ra nga mo-apply kadtong mga sakop sa indigenous community basta dunay certification.

Sa pangidaron, kutob lang sa 30 anyos ang dawaton apan mahimo ang 35 anyos basta adunay espesyal nga katakos nga matampo sa serbisyo sa bureau.

Samtang giklaro sa Director sa BFP-7 Supt. Gilbert Dulot nga bugtong ang lawas ang gikinahanglan sa examination ang dad-on sa mga aplikante.

Walay bisan usa ka dako nga kwarta ang pangayoon gikan sa aplikante nga posibleng mabiktima sa pasalig gikan sa mga mangingilad.

Ning bag-o lang usa ka babaye ang gidakop didto sa Negros tungod sa iyang modus nga mangayo og kwarta sa mga aplikante bugti sa pasalig nga makasulod sa BFP ang mga aplikante.

Tulo ka mga aplikante ang nailad og tag 150 mil sa naasoyng babaye kinsa gipasakaan na og kaso sa mga hingtungdan.

Ang BFP-7 mihimo og pamaagi nga masumpo ang mga tinonto, usa ka covenant signing alang sa mga recruits aron malikayan ang mga tinonto sama sa pangilad ug pangilkil sa mga mo-apply sa serbisyo.

Sa pagsulod pa lang sa BFP limpyo ug walay lama sa tinonto ang mga ma-recruit sa serbisyo ang gustong mahitabo sa liderato sa mga bombero.