Makulob ang kaldero

Luyo sa kapildihan sa mga kandidato nga anaa sa pwesto, ang mga empleyado gyud ang mabuthan ug makaubo kinsa seguradong makulban sa kaldero.

Ingon niini ang kamatuoran sa panarbaho sa gobiyerno nga walay kasegurohan diin magdepende lang sa panahon o “weder weder lang”.

Sa mga local government units kansang mga opisyal ang nangapilde pulos gyud intawon pangagho ang mabati gikan sa mga kawani ilabi na kadtong mga job order ug casual employees.

Sila ang maligsan sa politikanhong away sa mga lider nga nag-ilog sa gahum, sila ang dakung pildero kada human sa eleksyon.

Hinoon angayan pud nilang dawaton ang kamatuoran nga nabutang sila sa trabaho tungod sa politika. Mao kini nga ang pwesto nila haum sa “pulitika” nga nagpasabot nga “pulihan tika” sama sa pagpuli sa amo nga mapilde.

Walay kurat niadtong mga napildeng kandidato kay daghan man to sila natigum nga kwarta salin sa vote buying o ba kaha datu na silang daan.

Ang mga supporters nila aw, patid-patid og lata mangita og laing kapanginabuhian.

Naandan naman gyud nga limpyohan ang mga buhatan gikan sa mga tawo nga dili welcome sa mga bag-ong namunoan.

Apan dili sad angayan mokompiyansa ang mga regular employees kay ipaubos pa sila sa performance evaluation kay kun dili makapasar aw tulin pa sa alas kwatro hawa na sila sa pwesto.

Sama nalang sa Kapitolyo nga nibahad nang daan si Governor-elect Gwendolyn Garcia sa mga kawani nga “shape up or shape out”.

Hinoon ipaagi kuno sa due process ang tanan, kun naghimo sa trabaho ang kawani walay angayan kabalak-an, kadtong ligoy angayang mamutos na.

Lisud ug sakit nga kamatuoran apan gikinahanglang dawaton kay sa sinugdanan pa lang kahibalo naman mo daan kanus-a makulob ug kanus-a mahayang ang kaldero.