Kinsa’y daog?

Pagsuwat nako niining akong lindog, wala pa mahibaw-i kun kinsa sa mga kandidato ang nakakuha og labing daghan nga mga botos.

Unta, ang mga nangapilde nga kandidato makadawat ra dayon sa ilang kapildehan ug dili kay mangangkon nga sila gitikasan.

Apan kun kita sab ang anaa sa dapit sa mga kandidato nga gitikasan, tingali dili usab nato kapugngan ang pagsukol ug maninguha nga kapanalipdan ang atong katungod.

* * *

Husto kaayo ang mga isyu nga gituki sa debate nga gidumala sa Integrated Bar of the Philippines (IBP). Angay’ng kahatagan na og sulbad ang problema nato sa basura dinhi sa dakbayan.

Ang grabeng problema sa traffic angay na nga kapangitaan og maayong sulbad. Bahin sa traffic, dili ikapanghambog, may gamay ko nga ideya niini ug nga unta maminaw sab ang modaog sa pagka mayor dinhi sa dakbayan.

Ang gipasabot nako mao ang pagwagtang sa mga pay parking area sa mga karsada nga hagip-ot na kaayo. Kining kompaniya nga gikontrata karon sa dakbayan nga maoy mangolekta sa bayad sa parking, grabe kaayo nga midaginot gyud.

Pananglit kanang Pelaez Street gikan sa Sanciangko paingon sa eskina P. del Rosario dili gyud kana angay’ng parkingan og mga sakyanan diha kay huot kaayo ug makamugna og traffic.

Walay kaso ang tumoy sa Pelaez Street gikan sa P. del Rosario paingon sa eskina R. R. Landon Street (luyo sa Bangko Sentral) kay dili man daghan ang moagi sa maong karsada.

Laing karsada nga angay’ng i-regulate ang parking mao ang Manalili gikan sa eskina D. Jakosalem paingon na sa Carbon.

Mahimong one side lang sa karsada ang paparkingan og mga sakyanan.

Unya, angay gyud nga ibalik ang towing operations sa mga sakyanan nga masakpan nga ipataka lang pagparking. Tinuod, nagkadaghan ang mga sakyanan apan kon kontrolahon ang parking, makatabang kini aron nga momenos ang problema sa traffic.

Ang mga tag-iya og sakyanan kinahanglang mangita og kaparkingan nga dili sila makahasol sa mga mangagi nga motorista.

Unta, kun kinsa man ang modaog sa pagka mayor dinhi sa dakbayan sa Sugbo, karong eleksiyona, unta maminaw sila niining gamay nako nga sugyot.

* * *

Bahin sa problema sa lunop ug baha, kinahanglang tutokan na gyud pag-ayo ang pagpalawom sa atong kasapaan. Kinahanglang dili na magpanuko ang mayor sa paghawan sa kabalayan daplin sa kasapaan.

Bisan ako, maglagot gyud nga bisan hinay ra kaayo ang uwan, maglunop dayon diha sa downtown area. Tungod kini kay moawas na man ang tubig gikan sa mabaw na kaayong sapa.

Daghan pa unta ko og sugyot apan nahutdan ta sa luna.