Sinugdanan sa kausaban

Miabot na ang dakong adlaw sa paghukom ug sa pagpili pag-usab og bag-ong mga lideres.

Milyones sa tibuok nasud ang magpanon na usab ngadto sa mga presinto alang sa dakong piniliay karong adlawa. 

Gikan sa Batanes ngadto sa Tawi-Tawi, pahanon na usab sa tanang botanta nga ipakita ang ilang katungod pag-participate sa kalihokan nga naghatag kanato og dakong gahum pagpili og bag-o nga mga opisyal gikan sa Senado paubos ngadto sa konseho sa mga kalungsoran.

Masalimuot ang eleksiyon sa Pilipinas. Nagdupa tuod kita sa sagradong prinsipyo sa demokrasyoa. Apan matag piniliay, o panahon pa sa gani kampanya, ordinaryo na kaayo ang mga political violence.

Ambot ngano nga kabahin na kini sa atong kultura. Gani, walay ni usa ka eleksiyon nga hapsay ang pagpahigayon niini. Walay piniliay dinhi sa nasud nga dili gayud agasan og dugo. Kini tungod lagi sa kainit sa pulitika.

Apan mausab na kaha kini nga kultura? Sa akong pangagpas dili na kun pabilin ang katawhan nga wala ma-seminar sa ka sagrado sa ilang katungod pagpili og mga lideres nga layo sa dakong inpluwensiya sa mga pulitiko.

Buot kong ipasabot nga kun gawasnon pa lamang unta kita nga mopili sa atong mga opisyal, nan adunay dakong tsansa nga mausab ang sistema ug nga adunay politikanhong kalamboan ang nasud.

Dili ba nga tungod sa vote-buying kasagaran adto gayud mobotar ang botante sa mga kandidato kinsa mitingal kaniya og dakong kantidad sa salapi?

Dili ba nga tungod sa mga pagpang-harass sa mga goons sa mga pulitiko daghan ang mapugos pagbotar niadtong mga kandidato nga dili nila gusto?

Angay sugdan karong adlawa ang pagbag-o sa sistema, mismo sulod sa presinto. Ug kabahin na niini ang pagsalikway niadtong mga kandidato nga ang kahakog lamang sa gahum ang giapas ug dili ang tinuoray nga serbisyo.

Hinuon dili gayud kalikayan pagpamalit og mga boto sa mga kandidato.

Dawata ang salapi apan isulat sa balota kadtong angayan lamang pilion ug makamao nga mahimong opisyal sa lungsod o dakbayan.

Sa atong pagpanon sa mga presinto karong adlawa, angay natong hunahunaon nga atong napili ug isulat sa balita magsilbi nga maoy sinugdanan sa dakong kausaban nga maoy magdala unya sa gikahinamang kalamboan.