Kinsa’y nanghasi?

Mireklamo na si Koronel Royina Garma ngadto sa Comelec kay gihasi kuno ang iyang mga polis nila ni Mayor Tomas Osmeña ug Konsehal Maryann delos Santos dihang nag-checkpoint sila didto sa Barangay Kasambagan.

Ang Comelec regional director mitudlo na og abogado nga maoy moimbestigar sa reklamo sa hepe sa kapolisan dinhi sa Dakbayan sa Sugbo, ug gikalipay kini kaayo nila ni Osmeña ug Delos Santos.

Matud ni Delos Santos nga kataw-anan kaayo nga silang mga walay armas maoy manghasi sa mga polis nga armado, nga mition pa gani og armas sa usa nila ka political supporter.

Buyno, nindot nga dalion ang pagpagawas sa resulta sa imbestigasyon sa dili pa ang eleksyon. Sigurado ko nga gubot gyud kaayo ang eleksyon dinhi sa siyudad karong Lunes.

* * *

Pista sa Mandaue City kagahapon. Gipasigarbo ni Kongresista Jonas Cortes sa mga Mandauehanon nga gipirmahan na ni Presidente Duterte ang iyang balaudnon nga magbuwag na sa Mandaue City gikan sa 6th congressional district.

Gipasabot ni Cortes nga ang Republic Act 11257 nga maghimo na sa Mandaue City nga “lone congressional district” makapalambo kini sa siyudad kay ang iyang congressional budget, dili na man bahinon pa sa Consolacion ug Cordova.

Ang Cordova ug Consolacion sab mao na lang ang magbahin sa budget nga alang sa 6th congressional district. Sa ato pa, makabentaha sab ang duha ka lungsod.

Dugay na kaayo kini nga gihandom sa mga lumolupyo sa Mandaue nga mabuwag sila gikan sa 6th district, apan karon lang nga nahatagan og katumanan pinaagi ni Jonas Cortes.

Unya, may lain pa gyud nga kalampusan si Cortes kay gipirmahan pa gyud ni Presidente Duterte ang Republic Act 11273 nga magpalapad na sa Eversley Child Sanitarium Hospital gikan sa 50 ka katre ngadto na sa 200 bed capacity.

 Gipagahinan og minilyon ka pesos nga budget ang pagpalapad sa ospital ug aron maka-hire og dugang mga doktor, nurses ug ubang kawani, ug makapalit og dugang medical equipment. Sa ato pa, mas daghan na nga pasyente ang maalagaran.

* * *

Seryuso ang pasangil ni Mayor Tomas Osmeña nga nagtuo siyang may kalabotan si Koronel Royina Garma sa pagpadagan og mga illegal swertres sa siyudad.

 Lahi hinoon ang akong nahibaw-an. Ang uban sa mga illegal swertres operators, mga opisyal sa barangay, ug wala lang gipang-raid sa mga polis.

 Wala kaayo ko motoo nga si Garma maoy nag-operate og illegal swertres, apan makatuo ko nga may mga polis nga nagdawat og payola sa mga gambling lords kay nganong gipasagdan ra man nila ang maong ilegal nga kalihokan? Dili ba?