EDITORYAL - Kinsa kahay mabulahan?

Dili maayo ang sangputanan niining panagbangi nilang Cebu City Mayor Tomas Osmeña ug hepe sa kapolisan sa dakbayan nga si Police Col. Royima Garma tungod kay ang maalaot mao man ang mga Sugboanon.

Samtang ang kadagkoan sa kapolisan nangangkon nga neutral sila karong piniliay ug si Garma miinsister nga igo ra kining nagbuhat sa ilang trabaho, lahi man ang gipakita sa kapolisan.

Ang kapolisan gipasanginlang giipit ang grupo ni Osmeña pinaagi sa mga police checkpoints nga gibutang duol o palibot sa lugar diin gihimo sa partido sa mayor ang ilang mga political rallies o pulong-pulong.

Wala paalkanse ang mayor pinaagi sa pagyagyag sa giingong kalambigitan ni Garma sa illegal gambling ug nagdawat kini og P1 milyon nga payola gikan sa mga gambling lords sa Bohol.

Dugang pasangil ni Osmeña nga kadtong mga pagpangrakrak sa mga balay sa iyang mga kaalyado binuhatan sa mga polis nga nagpagamit sa iyang mga kaatbang.

Gihimakak kini sa kapolisan ug nagtuo hinuon silang ginama-gama lang kini aron paghimo og senaryong gubot gyud ang dakbayan sa umaabot nga eleksyon.

Kaning bahin sa pagpangrakrak maayo nalang wala gyud nakaigo og tawo maong gituohan nga usa lamang kadto ka pagpanghadlok, kinsa kahay mabulahan ani?

Ang kaatbang ba ni Osmeña nga si Bise Mayor Edgardo Labella kun mangahadlok ang mga sakop sa mayor? Kay ngano, kung manghasi diay ang usa ka politiko may makuha kining botos o simpatiya gikan sa katawhan? 

Nasayod man tingali ang tanang kandidato dinhi sa Sugbo nga dili ingon niana kadaling ilaron ang mga botante sa Sugbo. Kung dili si Labella, kinsa man?