Aduna bay Catholic vote?

Matag eleksyon, mobutho gyud ang pangutana kon aduna bay Catholic vote, bisan tuod og natubag na kini nga walay Catholic vote. Kini tungod kay ang matag Katoliko adunay gawasnon ug kaugalingong kabuot pag-exercise sa katungod pagpili.

Ang Simbahan igo lang mopahinumdom sa pagka-balaan ning maong katungod nga angayan kining ampingan ug dili panamastamasan pinaagi sa pagbaligya niini.

Sa atong nasinati, ang Simbahan wala ug dili mo-endorse og mga kandidato, Igo lang kining motambag ug mipahimangno to vote wisely and intelligently.

Hinumdoman nga si Fidel Ramos nga usa ka Protestante napiling Presidente sa tuig 1991. Ug sayud man ‘ta nga majority sa mga botante mga Katoliko. So, walay gitawag nga bloc- voting ang Simbahan.  Dili modiktar ang Simbahan kinsay botaran.

Pito na lang gyud ka adlaw, mag-eleksyon na. Mopakanaug na usab kita sa atong hukom kinsa ang angayan natong palingkoron diha sa nagkalainlaing katungdanan sa  panggobyerno.

Angay hunahunaon nga kun unsa man ang resulta sa atong pagbotar unya, mao na kini ang atong malantaw ug masinati kon unsa nga matang sa panggobiyerno ang atong matagamtaman.

Sa ato pa, kun masayop kita, pulos na kasaypanan ang atong masinati through the years ... hangtud na usab sa laing eleksyon.

* * *

Usa ka yanong lungsoranon sama kanimo ug kanako, si Juanito T. Fuerte misuwat sa usa ka nasudnong mantalaan nga nagkanayon:  “For your sake, vote wisely!”  Buot ipasabot nga mobotar kita for our sake, dili for the sake sa mga kandidato ug sa nag-endorse kanila. Sa ato pa, for the sake sa atong ugma, dili ugma sa mga kandidato kay tapus sa eleksyon, hayag gihapon ang ilang ugma.

Ikaw, unsa man? Unsa man ang imong ugma after the election? Imo kining matubag karong Mayo 13.  Busa, hinoktoki’g maayo, ayuha pag-discern  kon unsa nga matang sa ugma ang buot nimong masinati inigbotar nimo.

Mipadayon si Juanito:  “Voters, you’d once again be exercising your most important responsibility to your nation: voting! The choice is clear and simple: vote for candidates who are honest, capable and dedicated enough to do what is good for the advancement of both the nation’s and the people’s welfare.”

So, ang pagbotar usa ka daku natong responsibilidad ngadto sa atong nasud.  Dili kini tiawtiaw ug duwa-duwa lang. Usa  ka balaang kaakohan.

Ug sa imo unyang pagpili, unsa may imong criteria? Wa na bay labut ug wa na kinahanglana ang honesty, integrity, sincerity, ug katakos  sa mga tawo nga buot moalagad sa lungsod? Unsa may imong basihan inig botar na nimo?

Ang gidaghanon sa mga campaign materials nga naghugawhugaw sa atong siyudad? Kinsa ang nag-endorse nila? Ang kabangis sa ilang mga komentarista sa radyo pagdaot ug pagpakauwaw sa ilang mga kaatbang?

Akong usbon, vote wisely for your sake, dili for the sake sa mga kandidato kay after the elections, dili na kana sila manginlabot sa atong kinabuhi.  Wa na unya  ni silay labut o pakialam sa atong pagpuyo.  Suma, pila na ka eleksyon ang milabay sa atong kinabuhi ...unsa man, ang ilang pagpakabana nganhi kanato panahon sa kampanya, mao ba gihapon ang ilang pagtagad tapus sa eleksyon?

Busa, karong Mayo 13, good luck Philippines.