Pintas nga kinabuhi subo nga kamatayon

Matira ang matibay kini na tingali ang matawag natong pilosophiya sa kasamtangan karon. Aron mabuhi kinahanglan nga molihok ginamit ang kusog ug kapintas aron sa kadaghanan makabaton og pagtahud.

Mao nga daghan sa mga tawo ang nahimong idlas sa pagpaminaw sa pagbati sa uban. Mao nga nahimong paranoid, tungod niini nahimong magpanagana sa matag lakang nga pagahimoon.

Mao ang nahitabo niadtong pulis nga napatay sa iyang kaubanang mga pulis subo palandongon apan tinuod gyud diay ang gitawag nilang misencounter butang nga nakahatag og dakong sagpa sa kalpulisan ug kanatong tanan.

Nahinumdom nuon ko sa mga kritiko ni Lord Darth Vader nga sa matag higayon nga siya dili mahimuot iyang gamiton ang iyang gahum sa paghadlok o dili ba kaha pagpatay ni bisan kinsa nga mobabag kaniya. Naanad siya ning maong pamaagi ug sa dihang ang iyang anak nga si Luke Skywalker nidumili pagpatay kaniya nahigmata si Darth Vader nga dili diay tanang pamaagi kinahanglang gamitan og kusog ug kabangis.

Dulom ang palibot ingon man ang matag gutlo sa kinabuhi sa panaw sa yanong tawo nga mahadlok mapagan sa kapintas sa uban. Traumatic alang sa mga nakakita sa mga tawo nga gipatay sa paagi nga dali ra ug way babag. Alang sa mga nibuhat sa paghunos unsa kaha ang ilang gibati sa? Bayani ba sila o kaaway sa moralidad?

Kana kun matag usa nagtamod pa sa gitawag natong moralidad. Ang gutay sa tawhanong kalambigitan daw namantsahan sa makananap nga baruganan nga ang si bisan kinsang hawod mao lamang ang maghari ug ang utilitarian nga panghunahuna nagtudlo nga ang bisan kinsa nga way pulos angayan lamang tapuson.

Aron ang tawo mabuhi siya nagpinintas apan sa kaulahian nahimong subo ang iyang kamatayon kay bisan ang paghilak gidili man.