Sugbuanong miki

Sa wa pa si Yolanda, si Frank. Sa wa pa ang bakasi, ang batsoy. Tulo ka tuig sa wa pa manghasi ang bagyong Yolanda sa amihanang Sugbo ug sa silangang Kabisay-an, ang bagyong Frank nigusbat sab sa amihanang Sugbo ug sa kasadpang Kabisay-an.

Sa wa pa moulbo ang kontrobersiya sa pagka-apil sa bakasi sa Cordova sa salida sa Netflix sa mga pagkaon sa kadalanan sa Asya, nisuway mi og pangita sa orihinal nga batsoy. Nga nadungan sa among pagapud-apod og mga hinabang alang sa kaliboan ka biktima sa bagyong Frank niadtong 2010.

                                     * * *

Ang nagbaha nga mga gihatod sa manggihatagon nga mga Sugbuanon sa dinungan nga relief campaigns sa ABS-CBN Central Visayas ug Kapisanan ng mga Brodkaster ng Pilipinas (KBP) Cebu Chapter.

Giuna namo paghatod ang mga hinabang sa Bogo City ug kalungsoran sa amihanang Sugbo nga naigo sa bagyo. Dayon nitabok mi og dagat paghatod sa mga hinabang alang sa mga molupyo sa Iloilo City nga maoy labing lapad og kadaot, gibahaan ang tibuok dakbayan ug kasilinganang kalungsoran. Ug mao say gibantog nga nahimutangan sa orihinal nga batsoy.

                                     * * *

Tungod sa kadaghan sa mga hinabang, nga gikarga sa dagkong trak, nanghangyo mi sa pipila ka boluntaryo sa pagbiya sa makadiyot sa ilang mga pamilya, trabaho, klase ug patigayon ug pagkuyog aron nga mas paspas nga maapud-apod.

Kay wa man mahuman sa usa ka adlaw, nagkasabot ming sa Iloilo magpalabay sa gabii ug mangadlawon og balik sa Sugbo pagka sunod adlaw. Way naningil, apan nagsabot mi sa pagganti sa ilang kahago og panihapon sa orihinal nga batsoy.

* * *

Nahugno mi pagkahibawo nga wa sa Iloilo ang ngan sa batsoy nga among gipangita. Kay mao diay ngan sa distrito nga gigikanan ini. Gipapili mi sa duha ka kan-anan nga nangangkon nga orihinal ang ilang batsoy. Kay lawom na mang gabii, niadto mi sa kinadul-an.

Atu-ato lang ni, kon di pa tungod sa kalayo sa among naabtan nga mahimong nakausab sa among panilaw, way kalainan ang ilang batsoy sa among natilawan sa ato. Niinsistir ang tag-iya nga ilang katiguwangan ang nagmugna sa putahe. Nga usa sa sangkap mao ang espesyal nga miki. Nga, nakatag-an ka, ilang kinompra gikan sa Sugbo.

* * *

[email protected]