Sumpayan ta ang gahapon

Mayo 5, 2019: Ikatulong Domingo sa Pasko sa Pagkabanhaw

Mga Pagbasa:   Buh. 5;27-32,40-41/Sal. 30/Gip. 5;11-14/Jn. 21;1-19

Dili lalim ang gibati nilang Pedro ug mga kaubanan sa dihang namatay ang ilang magtutudlo sa paagi nga makauulaw ug dugoon.

Ning paagiha, buot na lamang nilang mobalik sa ilang kanhiay nga buhat sa pagpanagat og mga isda kaha tingali kay basin wala na nila makita ang bili kun nganong angayan pa silang mopadayon sa ilang buhat nga nasudlan kuyog sa magtutudlo nga gipatay sa balabag sa krus.

Ang uban pagkadungog ni Pedro nga niingon nga managat siya ang nihimo og pag-uyon diha sa ilang pagkuyog kaniya.

Apan wala silay nakuha. Pagkasayong buntag gimandoan sila ni Jesus sa pagtaktak sa ilang pukot sa tuong bahin. Nituman sila bisan wala sila makaila. Sa ilang paghimo sa ingon ilang nakita nga nakakuha sila og daghan butang nga nakapabuka sa ilang mga mata. Apan wala sila mangahas og pagpangutana.

Ang maong esena gitapos diha sa pagpangaon sanglit ang nabanhaw nga Ginoo ang nag-andam man og sinugbang isda alang kanila.

Sa atong kinabuhi, ganahan kitang mobalik sa naandan ug puy-an ang kagahapon. Labina tingali kadtong kagahapon nga puno sa gitawag natong kahimayaan.

 Atong naggambalay ang delusion of grandeur sa pagtuo nga  mahimong puy-an pa nato diha sa kasamtangan ang atong kagahapon.

Apan sa laing bahin dunay mga kagahapon nga maisip natong mga defining moments sa atong pagkatawo. Mga kagahapon nga naghatag og kahulogan ug direksiyon sa atong panaw sa kinabuhi. Mahimo man nato silang dad-on sa kasamtangan hinuon duna lang kitay himoong kausaban sibo sa sitwasyon.

Sa akong kinabuhi dunay mga higayon nga bation ko dako uyamot ang tumang kalaay sa kasamtangan mao nga wala koy laing nahimo gawas sa paghimo sa pagbalik lantaw sa higayon nga nagtukmod kanako sa pagtaak sa dalan nga akong gisubay karon.

Tinuod lisud na kaayo ang paghangop sa ideyalismo sa kapasikaran nga daghan na gyud ang nausab bisan gani ang palibot ug panghunahuna dili na mao.

Apan bisan sa kalisdanan ug kalaay nakita ko sa gihapon ang kahulogan kun nganong angayan kong maningkamot.

Sa dihang gibasa ko pagbalik ang akong mga pamalandong kaniadto akong nakita nga sa karon nahimo akong kampante sa akong kaugalingong kusog.

There is nothing to prove anymore sanglit nahatag naman ang tanan ug tingali panahon na aron mohinay ug hagpat hagpaton ang mga kasinatian nga magdala kanako paduol sa akong Dios o sa mga kasinatian nga nagpalayo kanako gikan k aniya.

Bugtong mapaubsanong kahilom lamang ang bahalang mosanong kun angayan ko pa bang balikan ang akong kagahapon.