Klaro kaayo uy

May nangutana nako kun unsay akong opinyon kabahin niadtong kontrobersyal nga checkpoint sa kapolisan didto sa Barangay Kasambagan, Dakbayan sa Sugbo kaniadtong miaging semana nga nagkalalis ang mga polis ug si Konsehal Mary Ann Delos Santos, apil na gani si Mayor Tomas Osmeña.

Mitoo ko sa pamahayag ni Delos Santos nga ang checkpoint operations gitumong gyud kadto aron pag-apiki kanila nga mga dumadapig sa Bando Osmeña Pundok Kausaban (BOPK).

Ako maoy mi-interview ni Delos Santos atol sa gipahigayong press conference nga nagdiskuter sa maong isyu.

Pag-abot nila ni Mary Ann sa Kasambagan aron makigtagbo sa mga driver sa habal-habal didto sa Sports Complex, walay mga polis nga nag-checkpoint, apan taudtaud kalit lang sila nga nangabot ug mi-set-up dayon og checkpoint.

Malipay ko kun ang mga polis mag-checkpoint, apan kon kini gitumong lang gyud aron apikehon ang usa ka politikanhong pundok, mosaway na sab ko niana.

Kinsa man gud ang dili makatuo nga kadtong police operations gitumong aron apikehon ang mga dumadapig ni Delos Santos nga kadto pa man sila mihimo og checkpoint sa maong dapit sukad-masukad. Suhito ko sa maong dapit kay nakaanha na ko diha sa makadaghang higayon.

Kun didto pa mag-checkpoint ang kapolisan sa “main road” sa Kasambagan, makaingon ko nga walay makaduda, apan misulod gayud sila didto sa interior sa Villa Aurora Subdivision nga wala may moagi didto, mao nga klaro kaayo nga ang ilang giatangan mao gyud ang mga nag-motor nga mga dumadapig sa BOPK.

* * *

Nakigkita gyud diay si Kongresista Gwen Garcia sa usa ka maglilindog sa The Freeman nga mihimo’g write-up sa iyang survey nga alkanse si Gwen sa iyang kaatbang nga si Vice Governor Agnes Magpale.

Si Magpale ug Gwen nagkaatbang karon sa pagpapili pagka gobernador sa Sugbo sa eleksiyon karong Lunes. Matud ni Atty. Josephus Jimenez nga sa iyang kaugalingong survey, nakabentaha si Magpale.

Kataw-anan kaayo kay pwerteng nakakisikisi ni Gwen ug wala motuo nga siya nabentahaan ni Magpale. Buyno, wala may nagpugong ni Gwen nga magtuo nga pildehon niya ang iyang kaatbang.

Apan akong nahibaw-an nga ang opisina diay ni Senate President Tito Sotto naghimo usab og kinaugalingon nila nga survey sa mga kandidato pagka gobernador sa Sugbo, ug ang resulta, susama ra kang Atty. Jimenez.

Gani may nakigtagbo na kang Magpale nga staff ni Senador Sotto. Sa ato pa, dugang suporta ang makuha ni Magpale niini kay siya man ang suportahan sa Sugboanong senador.

Bahin kang Governor Junjun, tan-aw nako wala man gyud siya’y problema batok ni Daphne Salimbangon. Pwede ra gani tingali nga matulog na lang si Davide.