Panimpalad ni Lolo

Sa gipahigayong job fair sa Department of Labor and Employment DOLE Region 7 niadtong Labor Day nagkadaiyang dagway sa mga aplikante ang akong nakita. Apan managsama ra ang aura nga mao ang kahigwaos nga makakaplag og trabaho tungod ug alang sa ilang pamilya.

Dunay mga fresh graduates kinsa nagbawon sa ilang mga dokumento sa kursong natapos nga maoy hanig sa ilang pag-atubang sa mga employer o kompaniyang gi-aplayan. Naa say mga beteranong aplikante nga bisan pa man sa ilang pangidaron wala gihapon mawad-i og paglaum nga makapandol og trabaho.

Usa kanila ang 53 anyos nga lolo kinsa kanhi OFW sa Qatar sulod sa napulo ka tuig.

Apan ang iyang tinigom kaniadto nihubas ra usab dayon sa pagpauli niya tungod kay daghan man ang galastohan sa iyang pamilya.

Tungod sa kalisod karon sa panahon nakahukom si Lolo Mamerto nga manimpalad og usab sa abroad maong nilinya siya og apil sa job fair.

Bawon niya ang iyang lawom nga kasinatian kaniadto nga maoy iyang hanig atubangan sa employer nga nag- interview kaniya.

Nasayod nang daan si Lolo Mamerto nga dako na kaayo og kalainan sa iyang lawas kaniadto ug karon nga edaran na siya. Kapoy na unta apan dili siya mo-surrender sa hagit sa kinabuhi nga iyang sudlan tungod sa pagmahal niya sa iyang pamilya.

Dunay pito ka mga anak si Lolo Mamerto apan wala makahuman ang duha samtang ang uban nag-eskwela pa. Busa kini ang naghatag kaniya og inspirasyon nga mokayod pa gyud mintras naa pa kuno siyay kusog.

Kasibot sa tigulang nga makatrabaho isipon seguro sa uban nga dispirado na diri sa nasod tungod sa kapait nga sitwasyon ilabi na sa ka gamay nga sweldo apan alang kanako angayan kining himoon nga sumbanan o inspirasyon nga magkugi ilabi na sa mga tawong tapulan nga maghulat lang nga hungitan sa uban.