Ang Semana Santa kaniadto ug karon

Sa among panahon, diin 5-anyos pa ko, pag-abot gyud sa adlawng Domingo, Pagbendita sa mga lukay, agi’g pagbukas-hangop sa unang adlaw sa Semana Santa, awhagon gyud mi tanan nilang Tatay Andot ug Nanay Totang nga manimba sa alas 8:00 sa buntag nga misa. Busa, kaming tibuok pamilya magdungan gayud pagsulod sa simbahan dala ang mga lukayng krus nga nianang pagka Sabado pa namo giandam sa paghimo.

Dili paliton ang lukay’ng krus kaniadto. Ipanghatag ra kini kun adunay mangayo. Pero karon, naglaray ang mga mamaligyaay dinha sa may baba, kilid o duol nga bahin sa simbahan.  Namora na hinuo’g taboan ang balay sa Diyos!

Gikan sa simbahan, ampingan namo ang mga benenditahang lukay’ng krus. Pipila niini ipahimutang sa gamay namong altar. Adunay ibutang ibabaw sa pultahan ug bintana, kay matud pa sa akong lola nga usa ka mananabtan, pang-alkontra kuno sa mga dautang linalang ug sagradong magbalantay sa among pagpahulay.

Gipasidan-an pud mi sa mga uyoang silingan, nga dili magkiatkiat sugod niining adlawa hangtod sa Sabado Gloria (Happy Easter) kay kun masamad o magaras, dili kuno mamaayo.

Kun dunay magdula namog lastiko, badlongon dayon: “Na’ay, ang mga Hudiyo, ay! Unsa ba mo sultian nga tiyempo ron sa pagpahulay, pagpamalandong ug pag-ampo?”

Gitahod namo ang mga pulong sa among katigulangan. Hinungdan, nga panahon sa Semana Santa, maminaw na lang mi’g drama sa radyo nga ang dugokan pulos kaagi ni Hesus ug sa Iyang mga apostoles.

Dinhi, nakat-on sab mi og sabat sa Pasiyon ni Hesus ug sa Siete Palabras nga ipahigayon sa balay nilang anhing Nang Meding kada Biyernes Santo, diin nahimo akong mamumulong.

Kaniadto, mingaw kaayo amoang dapit panahon sa Semana Santa. Ultimong pagkaligo sa dagat, gidid-an mi. Matag pamilya nakapokus sa pag-ampo, pagpamalandong ug pagbalaan niining mga adlawa.

Ma-feel gyud namo ang kasolemne sa mensahe nga gilitok sa Ginoong Hesus itaas sa krus diha sa naghilak-hinulsul namo nga kahilom.

Apan karon, ang bahakhak sa nangaligo sa dagat, ang nagkayuring nga kinantahan sa nahubog nang karaokehan ug ang kalanog sa masuk-anong bala sa mga riding-in-tandem, mao nay atong madunggan sa Semana Santa. Mga buhat nga nakapagisig samot sa kasingkasing ni Mama Maria.