Diha sa kapungot

Naghuot ang kadalanan gumikan sa kadaghan sa mga sakyanan.  Mao nga nahimong alimuot kaayo ang tanan  pun-an pa sa daghang mga tawo nga mokalit lang og labang uban ang makabungog nga talidhay ug bahakhak nga daghan.

Mga busina nga pwerteng kusoga.Makapikal kini sa ubang mga motorista nga moresulta og panag-away o dili ba kaha pinatyanay.

Dali ra kaayo mahurot ang pailob sa matag tawo karon. Gusto tang magdali apan kun masinati na ang kalisdanan gumikan sa linugdangan sa kaputong anha pa nato makita ang atong kahuyang.

Anaay mga tawo nga nahimong impulsive sa tanan nilang gihimo apan sa kaulahian nahimo silang malibog ug nahitumpawak sa kaalautan.

Lisud ang kinabuhi kun ang kaputong maoy pasultihon. Dunay panultihon nga nagkanayon: “Do not decide when you are angry, when you are confused or when you are in love!”

Adunay kaalam ang pagpailob. Diha sa pagpailob makita nato ang mas nindot ug mas maayo kaysa atong gihunahuna ug gilaraw.

Ang hustong panahon ug hustong gibati sa tukmang higayon dako kaayo og kahimoan aron malikayan nato ang bisan unsang makadaut sa atong kaugalingon ug sa uban.

Trapik man tuod ang kadalanan ning atong dakbayan, apan kun subayon lang nato ang kadalanan tingali atong masugatan ang mga tawo nga sa atong tabang magkinahanglan o dili ba kaha higala nga sa atong pahiyom ug gugma gikamingawan.

Ayaw padaug sa kapungot kay kini magdala kanato sa kadaut.