EDITORYAL - Mga ordinansa wa ipatuman, ngano kaha?

Pipila ka mga barangay sa siyudad sa Sugbo ang nabantayan karon nga duna nasab nag midnight parking diha sa kadalanan nga nakapahuot na sab sa karsada alang sa mga manglabay nga mga sakyanan.

Peligro sab kini kun adunay emerhensiya tungod kay maglisod og agi ang mga emergency vehicles sama sa mga bombero, ambulansiya ug kapolisan.

Ang mga giparada sa karsada diha sa mga kabarangayan dili lang sakyanan ug motorsiklo kondili hasta sab mga traysikad ug mga kariton. Bisan tuod gagmay lang kini, apan nakaali gyud kini sa agianan ug kinahanglan sab unta nga badlungon.

Ang siyudad sa Sugbo higpit kaayo kaniadto pagpatuman sa ordinansa ug gani dunay mga barangay nga ilaha gyud gisud ug gipangkarga ang mga motorsiklo ug gibutangan og clamp ang mga ligid sa mga sakyanan.

Angay hinumdoman sa publiko nga ang pagbaton og sakyanan o motorsiklo dili katungod kondili prebilihiyo lamang nga gihatag kanila sa gobiyerno uban sa kasabotang mosunod sila sa mga lagda sa trapiko.

Apan daghang nanag-iya og mga sakyanan ang wala tingali makasabot niini. Aduna pay uban nga gihimong talyer ang karsada kay anha na sila mag-ayo ug mag-welding ug uban pa.

Nag-unsa man diay kining mga barangay kapitan? Nahadlok ba kaha sila sa ilang mga konstituwente kun silay mangunay og badlong?

Makapahibulong sab nganong wala naman kaayo gipatuman ang pipila ka mga ordinansa nga sagad anha gyud ang mga paglapas mahitabo sa mga kabarangayan.

Kini sama sa implimentasyon sa higpit nga pagbahig sa basura  gikan sa malata ug dili malata subay sa Solid Waste Management Act  ug Noise Ordinance ug kining overnight parking.

Dili ba kaha tungod kay nagsingabot na ang eleksyon maong  hadlok ang mga opisyales sa siyudad nga ipatuman kining maong mga ordinansaha?

Karon kay eleksyon naman sab, nabalaka ba kaha silang dumtan sa mga botante karong Mayo? Di ba kini usa ka matang pagpangilad sa mga tawo?