EDITORYAL - Pagasa Island giangkon sa China

Murag gihagit gyud og maayo sa China si Presidente Rodrigo Duterte niining ilang gipagawas karong pamahayag nga “walay mahimo” ang Pilipinas kun dunay daghan nilang mga barko nga naglibot-libot sa Pagasa Island.

Ang maong isla mao ang ikaduha sa natural nga dagkong isla sa West Philippine Sea ikaduha sa Taiping Island nga gitawag sa international name nga Itu Aba island nga giokupar sa Taiwan.

Ang Pagasa Island sakop sa lungsod sa Kalayaan Group of Islands nga sakop sa Palawan. Ang maong isla gipuy-an sa mga Pilipino ug mga sundalo nga gidestino didto. Aduna kini kaugalingong mayor ug lokal nga pangagamhanan.

Apan sa report nga nigawas sa Wall Street Journal, ang Chinese Foreign Ministry namahayag “beyond reproach” nga ang buot ipasabot walay mahimo ang Pilipinas batok sa ilang mga barko nga naa sa kadagatan sa Pagasa Island.

Matud pa sa maong report, ang Chinese Foreign Ministry miingon nga ang Pagasa Island nga gitawag nilang Zhongye Island, ilaha.

Si Duterte sa pamahayag niini sa miaging semana, miingon nga dili siya mohangyo ug pagkiluoy sa China nga dili hilabtan ang Pagasa Island tungod kay duna siyay mga sundalo didto. Matud niya, kun tandugon kini, lahi na kini nga estorya kay iyahang paandamon ang mga sundalo alang sa “suicide mission.”  Kun paminawon ang pamahayag ni Duterte, makabuhi kini sa kasingkasing sa mga Pilipino.  Ug makakuha pa siya og simpatiya sa sitwasyon karon bahin niining paggara na og maayo sa China pag-ilog sa mga teritoryo sa Pilipinas diha sa WPS.

Apan dili kini makapapas sa kamatuoran nga nababoy na og maayo ang Pilipinas sa gihimo sa China.

Dili mahimong ang nakalabay nga administrasyon lang gihapon iyang basulon kay kining mga aksyon sa China nahitabo karon ubos na sa iyang pamunoan ug siya na maoy angay nga molihok.

Nagduhaduha ba kaha si Duterte nga bakwion sa China ang bilyones pesos nga ipautang sa Pilipinas alang sa iyang “build, build, build” program?