EDITORYAL - Peligro sa double plaka

Karon mismo na si Presidente Rodrigo Duterte ang namahayag nga delikado sa mga motorista kaning kontrobersyal nga doble plaka subay sa Motorcycle Crime Prevention Act (Republic Act 11235 ) nga bag-ohay lamang niya gipirmahan sa nakalabay nga buwan.

Si Duterte namahayag niini atol sa ika-25 nga kasumaran sa National Federation of the Motorcycle Clubs of the Philippines nga gipahigayon sa  Iloilo City. Si Duterte namahayag didto nga iyahang kombinsihon ang Land Transportation Office nga ioktaba lang una ang implimentasyon niini. Matud sa presidente ang pagbutang og duha ka lagpad nga plaka sa luyo ug atubangan “it is not good and dangerous.”

Mas pabor siya nga padak-an ang plaka sa luyo aron mas daling makita inay nga magbutang diha sa atubangan. Sagad sa mga pangagpas sa mga motorista, ang plakang ibutang sa atubangan posibleng molupad ug makaigo sa ubang tawo o ba kaha sambol sa dagan sa motor kung kusog ang hangin ug malamba na hinuon ang nagmaneho.

Gawas pa niana, hasta ang mga tarong ug responsable motorista naamong tungod lamang sa pipila ka lugas nga kriminal nga ang kapolisan palpak sa pagpakgang paghimo og krimen.

Ang kapolisan usa sa mga nangusog sa maong balaud nga mapasar tungod sa nagkadaghang krimen nga binuhatan sa mga kriminal nga magmotor.

Apan mahimo man gihapon pabutangan og numero sa motorsiklo ang atubangan basta dili na plaka kun buot lamang ang daling ilhanan ang tumong.

Walay dautan sa maong balaud kun ang benepisyo maoy tan-awon, apan kinahanglan unta nga gitun-an pagmaayo ang mga guidelines niini kun dili ba sab mabutang sa peligro ang mga motorista.