EDITORYAL - Usa o 600, pareho ra

Bisan usa ka buok o 600 ka mga barko nga naa sa sud sa teritoryo sa Pilipinas nga walay pananghid, ilabi na kun kini iya sa nasud nga nangilog og mga teritoryo, dili kini angay balewalaon sa gobiyerno.

Sa nanggawas nga mga report, giingong niabot og 600 ka mga barko sa China ang nagpalibot sa Pagasa Island sukad pa Enero ning tuiga.

Mga barko kini sa Chinese militia nga gisuportahan sa Chinese coastguard. Dili panggubat apan tungod sa gidaghanon gikonsiderar na kini nga hulga sa seguridad sa nasud ug nabutang sa peligro ang interes sa Pilipinas.

Tungod sa maong mga barko, naglisod ang mga Pilipino pagpanagat didto kay kanunay silang abugon.

Apan asa man ang gobiyerno sa Pilipinas, gipanalipdan ba ang mga mananagat?

Si Presidential spokesperson Salvador Panelo mikompirmar bahin sa mga barko palibot sa maong isla, apan matud niya dili tinuod nga 600 ka barko kondili 275 ra base kini sa ihap sa Armed Forces of the Philippines Western Command.

Ang Department of Foreign Affairs nipadangat na og protesta batok niini base sa report sa AFP.

Gawas nga 275 lamang daw ka barko, susama pa gyud ug gidapigan ni Panelo ang presensya sa maong mga barko pinaagi sa pag-ingon nga wala maglibotlibot sa Pagasa ang maong mga barko kondili naa ra gyud sila didto. Tingali iyang gipasabot nag-angkorahe ra.

Ang gobiyerno sa Pilipinas sa kasamtangang administrasyon gisaway og maayo tungod sa gihulagway nga pagpabaya sa padayong pagpangilog sa China sa mga teritoryo diha sa West Philippine Sea.

Ang nakalabay nga administrasyon wala makiggiyera kondili gipaagi sa korte ang pakigbisog batok sa China ug nidaog sa kaso pabor sa Pilipinas. Apan inay iinsister ang maong kadaogan, gipadaplin kini sa kasamtangang administrasyon.

Kun tinuod ang mga reklamo sa mga mananagat nga gidid-an sila nga makapanagat didto sa China, hayan kontrolado na sa maong nasud ang maong teritoryo.