“Weak apan Strong”

Sa nasinati karon nga weak El Niño karon murag dako naman ang epekto niini sa katawhan.

Gani didto sa kaulohan kun makita nato sa balita sa telebisyon grabe gyud ang sitwasyon sa mga tawo nga maglinya daplin sa karsada kay maghulat sa rasyon sa tubig.

Ang uban mag-away na gani kay naa man sad lagi mamintaha nga magdala pud og hilabihan ka dagko nga pundohanan sa tubig.

Gani ang presyo sa balde ug ubang mga water container nag over price naman kay halinon man kaayo.

Ang kondisyon sa water shortage sa kaulohan miabot na sa kongreso aron paimbestigahan lagi kuno.

Epal sad kaayo ning mga politiko nga mag grandstanding sa isyu aron lang gyud makakuha sa attention sa media.

Ang nahitabo sa kaulohan maayo unta dili pud mahitabo dinhi sa Sugbo nga ingon niana ka grabe nga bisan tubig ikaligo wa na.

Dinhi sa Sugbo apektado na usab kita sa El Niño kay nangahubas naman ang mga tinubdan sa tubig hinungdan nga mitiyabaw na ang mga mag-uuma sa mga upland barangays sa Cebu City.

Nangalaya ang tanan nga mga pananom ug ang uban wala na gani mopugos sa pagtanom sa ilang mga produkto kay wala pa lagi magamit nga tubig.

Dayag kaayo sa mga bunga sa prutas, mga leafy vegetables ug kadtong mga bunga sa utanon nga hilabihan ka gagmay ug botihon pa gyud ang panit.

Salin kini sa huwaw nga gipupo nalang sa mga mag-uuma aron duna silay ikabaligya ug ikapalit sa ilang pagkaon.

Hinoon ang Cebu City Agriculture Office mipagawas ug 12 milyones pesos nga magamit sa pagpalit ug mga water containers nga iapud apod sa mga mag uuma sa 28 ka upland barangays.

Ang  pangutana unsa may isulod sa container kun nahubas na ang water source?  Maayo lagi og naay ulan kay gamit kaayo ang mga pundohanan og tubig apan kun wala, aw wala gihapoy kapuslanan.

Gawas lang kun adunay rasyon nga tubig nga moadto sa bukid aron butangan ang mga water containers.

Samtang gipatuman na sa Metro Cebu Water District ang water rationing sa mga dapit ilabi na kadtong hinay ang pressure sa tubig.

Hapit na mohubas ang ilang tinubdan sa Buhisan dam ug nagkagamay usab ang tubig sa Jaclupan dam. Ang gibanatan karon sa MCWD mao ang ilang ground water sources.

Sa miaging buwan pa lang kita nagsugod og sinati sa huwaw apan grabe na ang epekto niini karon. Busa gikinahanglan nato nga mangandam kay molanat pa kuno kini hangtod sa Hunyo ang El Niño.

Matud sa PAGASA nga weak El Niño ra apan strong pud kaayo ang epekto niini sa katawhan.