Kahimayaan ug ang kasakit

Marso 17, 2019: Ikaduhang  Domingo sa kwaresma

MGA PAGBASA:  Gn. 15;5-12,17-18/Sal. 27/Fil. 1;20-4;1/Lk. 9;28-36

Kini ang atong mahulagway sa nahitabong Transfiguration kun ang mahimayaong pagkausab sa Panagway ni Jesus. Nahitabo kini sa dihang wala pa atubanga niya ang iyang kamatayon gikan sa mga kamot sa mga tawo nga naglagot kaniya. Gipanagna kini sa mga propeta sama ni Elias ug katumanan sa balaod ingon nga representation ni Moises. Ang balaod nga nahimong atong sukaranan mao man ang balaod sa gugma. Gugma nga pinasikad sa maayong tinguha alang sa kalingkawasan sa usa’g-usa. Ang ebanghelyo naghagit kanato ning mosunod:

1. Ang pagsaka padung sa tagsa tagsa nato ka mga bukid sa kahilom aron atong pangitaon ang atong nawalang kaugalingon.

2. Ang pag-usisa sa tagsa tagsa kun nahimo ba kitang andam ug tagana nga mosalindot sa bisan unsang sayon apan magdala og kamatayon ug ang pagdawat sa bisan unsang lisud apan magdala og kinabuhi.

3. Anaa ang mga significant others o dili ba kaha ang mga alter egos sa atong gitinguhang mga ideal self. Kini ang naglangkob sa Balaod sa kamatuoran sa atong kaugalingon. Ingon man ang paghangop sa gisinggit sa atong kahiladman nga mao ang tinud-anay nga kalingkawasan gikan sa bakakong projection sa uban aron kita pugngan sa pagpadayag sa atong kaugalingon.

4. Ang tinguha nga matagamtam nato ang kasinatian sa kasamtangan diha sa kahimatngon nga ang kinabuhi diay human sa kasakit mamahimong milagroso ug makapapukaw sa nahikatulog nga kaikag sa pagpakabuhi.

5. Nga ang maong kasinatian sa kahimayaan dili lang tipigan kondili ipaambit usab sa uban.

Dili lang ni mahitungod sa dala sa kalbaryo. Mahitungod kini sa pagpili nga mas palabihon ang dalan sa kasantos diha sa kalipay taliwala sa kalisud kay sa himoong komplikado ang bisan unsang sayon kay maoy mando sa relihiyon.