Pusil sa Mandaue

Tan-aw nako mora’g nagkainit na gyud ang politika diha sa Mandaue City kay usa sa suod kaayong dumadapig sa politika ni Kongresista Jonas Cortes gipusil kagahapon.

Maayo gani kay wala mapatay si Idik Go, apan samaran ang biktima. Ang pagpamusil kaniadtong Huwebes sa hapon sa may buwangan sa Mandaue, mora’g wala kaayo mahibaw-i sa kadaghanan kay ang mga reporters busy sa pag-follow up sa dalagita nga gipatay sa Lapu-Lapu City.

Husto ang gihimo ni Cortes nga wala lang mohatag og pamahayag kalabot sa pagtinguha pagpatay sa iyang dumadapig, apan miawhag lang sa kapolisan nga ayuhon ang pag-imbestigar niining maong kaso.

Apan ang sinaligan ni Cortes nga si Atty. Jamaal James Calipayan, mipagawas og post sa social media, nga nabalaka siya niining lakang nga mora’g gi-harass karon ang ilang mga sakop sa campaign team.

Wala man sab hinoon namasangil si Calipayan nga ang ilang mga kontra maoy naghimo, apan masabot kaayo nga sila nagduda niini.

Wala malilong nga si Cortes ug Mayor Luigi Quisumbing nag-ilog kun kinsa kanila ang modaog sa pagkamayor sa  Mandaue atol sa eleksiyon karong Mayo.

Pastilan bitaw no, sa miaging eleksiyon niadtong 2016, init man usab ang away sa politika tali ni Cortes ug sa mga Ouano, apan wala may ingon niini nga may dumadapig sila nga gitinguha nga patyon.

Angay gyud nga imbestigahon pag-ayo sa kapolisan kining maong pagpamusil.

* **

Kagahapon, nag-drive ko sa akong sakyanan diha sa dalan Escario. Napikal gyud kaayo ko kay ang usa ka gamay’ng awto nga diha sa akong atubangan, hapit na lang nga dili moirog. Layo na kaayo ang sakyanan nga iyang gisunod.

Ang rason diay kay ang maong gamay’ng awto, gimaneho diay sa usa ka bag-o pa nagtuon sa pag-drive. Pastilan, nakapasamot sa traffic kay tabla ra man og nababagan ang mga sakyanan nga nagsunod.

Tukma kaayo ang ordinansa nga gipangamahanan ni Konsehal Jun Gabuya nga did-an gyud ang mga student driver sa pagpraktis sa mga busy kaayong karsada, usa na niini ang dalan Escario.

Si Isko Ouano, ang operations chief sa CITOM, misuporta sa balaudnon ni Konsehal Gabuya nga unta maaprobahan ug ipatuman dinhi sa siyudad.

* * *

Daghan man gud nga mga driver nga ang uban edaran na unta, apan kuwang og kahibawo sa tukmang lagda sa pagmaneho og sakyanan.

Kagahapon sab, nagtungas ko sa Veterans Drive paingon sa Marco Polo Hotel, ang multicab nga akong gisunod, kusog lang og gamay sa porlon, unya nagpatunga.