Depresyon ang taya sa kalaglagan

Daghan ang nakasinati na og depresyon. Walay makalingkawas niini labina kun sa hinayhinay nga paagi kini mokutkot sa atong kaugalingong gambalay.

Kun dili nato kini makita sa dayon, magdala kini og tumang kadaut sa atong kaugalingon ug sa atong mga pamilya.

Mao nga uban maghikog sa way igong hinungdan, ang uban nawad-an na og igong tinguha nga magpakabuhi. Ang tanan lad-ang ug way hinungdan. Ang tanan way lami. Kasagaran sa ig-on sa maong depresyon mao ang atong mga kabatan-onan nga nahimong biktima sa pressure sa ilang gimbuhaton ug sa ilang mga ginikanan mismo.

Taas ang ilang level of awareness sa mga panghitabo apan less kaayo ang ilang tolerance of pain. Tingali kaha tungod kay ato mang gitugotan nga mahatag ang tanang sayon alang kanila. Sa paghatag sa tanang sayon halos sa tanang aspeto sa ilang kinabuhi, malisud alang kanila ang pag-atubang labina kun may mga suliran nga mopatim-aw diha sa ilang      kinabuhi.

 Lisud labina kun way igong kapaingnan ug kasultihan ug kun duna man gani, malisud alang kanila ang pagsulod sa proseso labina kun ang ilang giduol way igong katakus ug kahibalo sa ilang kahimtang.

Unta ang matag tunghaan ang maningkamot sa paghimo og profiling sa ilang mga high risk nga mga tinun-an ug labaw sa tanan, mas makaayo kun anaa ang kukabildo ug ang tinguha nga maminaw sa kahimtang sa usag usa bisan pa man kun walay sulbad nga makuha diha diha. Makaayo ang paminawon ug labaw nga makaayo ang paghatag og igong pagtagad sa usag usa.