EDITORYAL - Tinuod nga hustisya para ni Christine

Nagabot-abot ang mga hinabang bunga sa kaluoy ngadto sa pamilya sa dalagitang si Christine Lee Silawan nga linoog nga gipatay sa usa ka bakanteng luna sa Barangay Bankal sa Dakbayan sa Lapu-Lapu.

Si Presidente Duterte mihatag og hinabang alang sa pamilya, ang buhatan sa Mayor sa Dakbayan sa Lapu-Lapu miboluntaryo sab nga mohatag og tabang samtang ang Office of Presidential Assistant to the President-Visayas mitunol sab og dugang salapi isip ganti dugang sa una nang gitanyag sa kapolisan alang sa sayong pagkasikop sa mga mamumuno.

Ang maong mga hinabang makatabang og dako sa ilang galastuhan sa pagpahipos sa patay’ng lawas sa biktima ug sa paspas nga pagkasulbad sa kaso.

Apan dili kabayran bisan pila ka milyon ka pesos ang kinabuhi sa tawo, mas pa kun dili mao ang mapasanginlan.

Panghinaut lamang sa tanan nga pinaagi niining ganti madakpan ug mataral sa hukmanan ang tinuod nga mga mamumuno.  Ilabi na nga may mga hitabo na kaniadto sama sa gidangatan ni Bella Ruby Santos ug sa karelasyon niining Briton nga si Ian Charles Griffiths bahin sa pagdagit og pagpatay sa 6-anyos nga batang si Ella Joy Pique niadtong Pebrero 8, 2011.

Si Pique giingong gikan sa tunghaan sa dihang gidagit ug napalgang patay didto sa Lungsod sa Barili pagkasunod adlaw. Milanat pa og tulo ka tuig ang pagdagan sa kaso apan napamatud-ang inosente ang duha sa korte.

Di kadto tiaw nga kauwawan sa habig sa napasanginlan nga gipriso sud nianang mga tuiga. Inhustisya sa nasaypan ug mismo sa biktima.

Dili na unta kadto mausab nga ang tanyag nga ganti maoy mahimong hinungdan sa pagkaguba sa mga inosenteng tawo. Way laing makapabawi sa gibating kasilag ug kagul-anan sa pamilya ni Silawan kondili ang pagkasikop ug pagkabilanggo sa mga tinud-anay nga sad-an.  Hustisya para sa ilang anak ug hustisya ug katagbawan sa katilingban aron magpabilin ang pagsalig ngadto sa mga otoridad ug sa sistema sa hustisya sa nasud.