Misumbalik na

Nakadawat ko og mensahe sa akong messenger. Wala gyud ko masayop sa akong pagtuo nga mosumbalik ra kang Mayor Luigi Quisumbing ang iyang pagpasirado sa Big Hotel ug CENORE nga nagbase sa Mandaue City.

Tulo ka kawani sa maong hotel mipadala kanako og mensahe nga sila nahiubos gyud sa gihimo sa mayor sa ilang kompaniya nga gigukod kay basin og gidudahan nga supporters sa iyang kaatbang sa politika.

Gusto gani kuno sila nga magpa-interview aron ikapadangat nila kang Quisumbing ang ilang mga sentimento. Apan, gipasabot nako sila nga kay dinhi man nila mabasa sa akong lindog, anhi lang usab nako dinhi hisgotan.

Nakasabot ko sa sentimento sa kapin 300 ka trabahante nga sa dili madugay mawad-an og trabaho. Mihukom na ang tagdumala sa hotel nga mosirado na lang gyud sila, apan nakasabot sila nga pamolitika ra gyud ang gihimo ni Quisumbing sa ilang kompaniya.

Ang pagtuo sa mayor nga nabentahaan ang siyudad sa transaksiyon uban sa kompaniya nga nagdumala sa hotel, masulbad ra man unta kon ang nagdumala sa City Hall nakiglingkod pa sa maong mga opisyal aron ilang hisgotan ug sulbaron nga malinawon ang isyu.

Karon kon manirado ang hotel, kapin sa 300 ka pamilya ang posibleng magutman, walay ikabayad sa abangan sa balay, ug posible pa nga wala nay magamit pagpatungha sa ilang mga anak sa umaabot nga tingbukas sa klase.

Husto si Kongresista Jonas Cortes sa iyang pamahayag sa pamantalaan nga angay pa gani unta ni Quisumbing nga dasigon ang mga magpapatigayon nga momugna sila og daghang negosyo sa Mandaue, kay sa panggukdon nga makapaislag na hinoon sa ubang mga magpapatigayon.

* * *

Ang social media nindot kaayo kon ayuhon lang, apan ang nahitabo karon gigamit kini sa mga ‘troll’ sa pagdaut, pagbugalbugal ug pagtamay sa mga tawo nga dunay mga post nga wala nila magustohi.

Ingon niini ang nahitabo kanako dihang mihisgot ko nga si Mayor Tomas Osmeña gusto gyud nga modaug ang iyang runningmate pagka bise mayor nga si Konsehal Mary Ann delos Santos.     

Igo ra ko nga miingon nga kon maoy gusto ni Osmeña, aw haum ra man usab si Mary Ann nga mahimong mayor kay nakatapos man siya sa kurso nga abogasiya.

Pareho ra gud kon si Vice Mayor Edgar Labella ang pasultihon, gusto usab siya nga si Mike Rama ang modaug, ug alang kanako, haum gihapon si Rama sa posisyon.

Apan daghang mga tawo nga talawan ug nagtago sa ilang “identity” ang nagpataka lang og pamasangil. Maayo gyud nga pangitaan og paagi aron ang mga ‘troll” mangahanaw.