Lista sa druga

Posible kuno nga molihok ang salapi sa druga sa umaabot nga eleksiyon karong Mayo.

Mao kini ang pangagpas ni Chief Superintendent Debold Sinas, ang direktor sa Police Regional Office sa Central Visayas.

Gibasi kini ni Sinas sa daghang druga nga nagkatap karon sa Sugbo.

Alang kaniya, naningkamot karon ang mga sindikato sa druga aron makahipos og daghang salapi aron ilang igasto sa ilang mga kandidato.       

Hinuon pangagpas lamang usab kana sa direktor sa PRO-7.

Apan kon tinuod man kini, siguro walay kahadlok kining mga pulitiko bisan pa niining gihingusgan karon nga gubat batok sa druga sa administrasyong Duterte.

Apan alang kanako, wala na siguroy pulitiko nga mangahas karon sa pagpakig-abiba niadtong mga nalambigit sa druga.

Kini ilabina nga daghan na sa mga pulitiko ang natiklo sa kampanya sa otoridad batok niining ilegal nga negosyo.

Gani, adunay listahan ang Department of Interior and Local Government ug ang Philippine Drug Enforcement Agency sa mga kandidato sa umaabot nga eleksiyon kinsa giingon nga nalambigit gayud sa druga.

Gusto sa maong mga ahensiya nga ipublikar kining maong listahan.

Kini aron kuno nga makita ang ilang katag ug mailhan sa mga botante kung kinsa gayud kining mga kandidato nga mga protektor sa druga.

Suportado ni Presidente Rodrigo Duterte ang maong lakang.

Apan daghan ang mirebenta niini, nga usa kuno ka kalapasan sa tawhanong katungod sa mga kandidato nga anaa sa listahan.

Kini tungod kay inosente pa kuno sila gumikan kay wala pay kaso nga gipasaka batok kanila.

Matud sa usa ka opisyal sa Comelec, mas labing maayo nga pasakaan lamang og kaso kining mga kandidato nga anaa sa drug list.

Kini kung aduna gyuy konkretong ebidensiya ang kagamhanan batok kanila.

Ambot kun unsa ka bag-o kining maong listahan sa mga kandidato nga giingong nalambigit sa druga.

Kay kun lab-as pa kini nga listahan ug nga aduna gayuy lig-on nga ebidensiya ang otoridad batok kanila, basin kun wala na gyuy kahadlok kining mga narco politician nga makiha o matukhang.