EDITORYAL - Di pa gihapon luwas

Kabangis ug walay kaluoy ang gipakita sa mga mamumuno sa 16 anyos nga nag-alagad sa simbahan sa dihang ilaha kining gipanamastamasan sa bakanteng luna sa Barangay Bankal sa Dakbayan sa Lapu-Lapu.

Gituohang nahitabo ang krimen gikan sa Domingo sa gabii hangtud sa Lunes sa kaadlawon sanglit buntag na nakit-an ang lawas ni Christine Lee Silawan kinsa nagpuyo sa pikas barangay duol sa nahitaboan.

Ang biktima gituohang gilugos tungod kay wala na kini pang-ubos nga sapot.

Apan wala pa gyud matagbaw ang mga kriminal, gidunggab pa gyud kini sa makadaghang higayon nga gikamatay sa biktima.

Ug aron pa gyud pagpakita sa kung unsa sila kabangis, gilaplap pa gyud ang nawong sa dalagita ug kundili pa tungod sa inahan, way tawong makaila niini.

Ang kapolisan sa Dakbayan sa Lapu-Lapu dako ang pagtuong sabog sa ilegal nga drugas ang naghimo sa maong krimen ngadto sa dalagita.

Ang ilegal nga drugas maoy gitumbok sa kapolisan nga nakapadaghan sa mga krimen dinhi sa nasud. Gani tungod sa pagpangusog sa kampanya batok niini, nimenus gyud ang gidaghanon sa mga dagko ug ginagmay nga krimen sama sa mga pagpangawat ug pagpanulis.

Apan bisan pa niini, makapahibulong kun nganong nisamot man hinuon kadaghan ang mga shabu nga nasakmit sa nanglabay nga mga operasyon.

Dili ba kaha kini tungod sa kamaayo na sa taktika ug estratehiya sa kapolisan o mas nahimong sayon sa mga dagkong sindikato sa drugas ang pagpalusot niini dinhi sa nasud karon?

Busa dili angay magkompiyansa ang mga ginikanan ilabi na ang mga kabatan-onan tungod kay bisan pa man sa malampusong kampanya sa gobiyerno batok ilegal nga drugas aduna gihapoy mga durugistang makahimo gihapon og dili matugkad nga krimen.

Ang pag-ampo sa katawhan para sa biktima aron mahatagan kini og hustisya dalang pagkondenar sa maong hitabo0 senyales sa grabe nilang kasilag ngadto sa mga nagbuhat niini.