Negosyante nadismaya

Nasubo ko pagkadungog nga manirado ang Big Hotel ug ang CENORE diha sa Mandaue City. Kapin sa 300 ka kawani sa maong mga balay patigayon ang mawad-an og trabaho.

Dili sayon nga mawad-an ka og trabaho kay dugay ka pa nga makakita og laing kasudlan, mao nga misimpatiya ko sa maong mga kawani nga tingali napagan lang sa politika.

Nangangkon man gud si Mayor Luigi Quisumbing nga anomaloso   ang transaksiyon nga gisudlan ni kanhi mayor ug karon, Kongresista Jonas Cortes, sa pagpaabang sa yuta sa Mandaue ngadto sa usa ka hardware.

Ang hardware nakigkomboya og laing kompaniya aron matukod ang dakong hotel. May mitug-an nako nga nagtuo man gud si Luigi nga ang tag-iya sa Big Hotel ug CENORE tua miabin kang Cortes.

Si Cortes ug Luigi nag-atbang karon pagpapili pagkamayor sa Mandaue City. Dunay daghan nga nakapangutana kun nganong karon ra man kini himoa ni Luigi nga hapit na ang eleksiyon?

Nadunggan nako  nga ang transaksiyon pagpaabang sa yuta giaprobahan man sa City Council sa Mandaue ug kun wala ko masayop, ang presiding officer mao si Vice Mayor Carlo Fortuna nga ka-tandem karon ni Luigi.

* * *

Dinhi sa Dakbayan sa Sugbo, gipahibawo ni Mayor Tomas Osmeña nga mitanyag kaniya ang Metrobank nga mopalit sila’g tulo ka ektaryang yuta sa South Road Properties (SRP) sa kantidad nga tag P1.5 Bilyones kada ektarya.

Nindot kaayo ni nga transaksiyon ug sigurado ko nga walay mosupak niini sa mga alyado sa oposisyon tungod sa kantidad nga ibayad sa Metrobank. Tabla ra og nanirador niini si Mayor Osmeña nga sa usa ka bala nakaigo siya og duha ka langgam.

Abi ninyo og ngano? Kun mahinayon nga ang Metrobank makapalit og bisan tulo lang ka ektaryang yuta sa SRP, mapamatud-an man ni Osmeña nga barato ra gyud kaayo kadtong pagbaligya ni kanhi mayor Mike Rama og 45 ektaryang yuta sa SRP nga tag P38 mil ra ang kada metro kwadrado.

Ang P1.5 Bilyones nga kantidad kada ektarya, nagpasabot nga tag P150 mil ang presyo kada metro kwadrado. Mao ni ang giingon ni Osmeña nga tinguha gyud niya nga bawion ang 45 ka ektaryang yuta nga nabaligya kaniadto panahon ni Rama kay barato ra kaayo ang presyo.

Gusto ni Osmeña nga ang City Council pagadumalahon usab sa iyang kaalyado nga si Konsehal Mary Ann delos Santos kay aron nga daghan siya og mga mamugna nga proyekto para sa katawhan sa dakbayan.

Aw, kun swertehon si Delos Santos, haum man usab siya nga mahimong bise mayor kay gradwado man siya sa abogasiya.