Sala ba ang pagpatay’g iro
Bata pa ko, hadlok na ko’g iro. Labi nag adunay irong buang nga nag-wild sa karsada, kusog kaayong mamugno kun makakita laing iro, haskang makasaka dayon nako sa among balay, manrangka ug didto sa bentana manambo – nagtan-aw sa mga isog silingan, kinsa nanagdalag bitik ug bunal nga migukod sa irong buang aron tipion.
Ug anha na ko mogawas kun napatay na nila ang mananap. Hinuon, kaniadto, bisag dili buang ang iro nga ihawon, wala gyuy polis nga mobadlong. Polis pa man gani ang mopalit sa mga lamas sa giihaw’ng iro nga himoog kalderita!
Suwerte, kay wala pa matawo niadtong panahona ang RA No. 8485 or Animal Welfare Act of 1998. Mao nga mahimo rag pasipad-an ang iro. Pero’g karon pa to nahitabo, delikadog mapasakaag kaso ang naghimo. Ngano?
Tungod kay ang RA No. 8485 Section 7 ug Section 8 nagkanayon:
“(7) It shall be the duty of every person to protect the natural habitat of the wildlife. The destruction of said habitat shall be considered as a form of cruelty to animals and its preservation is a way of protecting the animals.
(8) Any person who violates any of the provisions of this Act shall, upon conviction by final judgement, be punished by imprisonment of not less than 6 months nor more than 2 years or a fine of not less than P1T nor more than P5T or…”
May polis sa Santander Police Station, PO2 Richard Cabalida nga nakapusil-patay og iro sa Barangay Talisay sa maong lungsod.
Giingong napugos siya pagluthang sa iro kay dihang iya kining nasugatan gipaghot siya. Ug tungod sa kahadlok nga paakon, iya na lang giunhan sa pagpusil.
Ang tag-iya nga si Jenelyn Rusiana mitug-an, nga hinigtan nila ang maong pinalanggang iro ug nakabuhi lang gyud kuno niadtong tungora.
Pagkangalan nga silingan ra sila, wala na moreklamo si Jenelyn bisan tuod og may kahapdos sa kahinugon nga mihiwa sa iyang kasingkasing.
Pangutana: Ang pagpatay’g iro sama sa gibuhat sa polis, sala ba? Mga suki namong The Freeman Banat News readers, anaa ra ninyo ang paghukom.
- Latest
