Pagsakmit sa mga lisensiya

Andam ang mga magbabalaod sa Mandaue City ug Talisay City sa pagpasar og ordinansa nga maghatag og gahom sa ilang traffic enforcers sa pagsakmit sa mga lisensiya sa mga motorista nga makalapas sa mga lagda sa trapiko sa ilang mga hurisdiksiyon.

Apan panid-an una nila unsay mahitabo sa pagpatuman sa Cebu City Transportation Office (CCTO) sa samang ordinansa nga napasar sa Cebu City Council niadto pang Oktubre sa niaging tuig.

Kay sama sa Cebu City, wa sab hatagi og deputation sa Land Transportation Office (LTO) ang traffic enforcers sa Mandaue ug Talisay.

* * *

Nangisog ang lokal nga mga opisyal sa pagtaod og dugang ngipon sa pagpatuman sa ilang mga lagda sa trapiko tungod sa pagpatigbabaw sa Korte Suprema niadtong 2005 sa gahom sa Metro Manila Development Authority (MMDA) sa pagsakmit sa mga lisensiya sa madakpan nga mga drayber.

Niangkon si Atty. Ismael Garaygay III, pangu sa CCTO, nga di ang Cebu City maoy unang nisunod sa MMDA.

Ang Iloilo City nipatuman na sa samang ordinansa sugod niadtong 1992. Gikuwestiyon sa mga motorista ang ordinansa apan gipatigbabaw sab sa korte ang legalidad ini.

* * *

Maapiki hinuon ang mga motorista nga makuhaan og lisensiya. Kay ang citation ticket sa CCTO di balido sa gawas sa Cebu City. Gawas lang kon mopasar sa samang ordinansa ang tanang dakbayan ug kalungsoran sa Sugbo.

Maong gipaneguro nilang Garaygay nga unya na nila ipatuman ang ordinansa kon mapahimutang nang adjudication board.

Nga tibuok adlaw ug tibuok gabii nga mohusay sa mga reklamo sa mga madakpan o modawat ug mo-resibo sa ilang multa.

* * *

Masaligon si Talisay City Vice Mayor Alan Bucao nga mas tuohan nang ilang mga lagda sa trapiko kon makasakmit na og lisensiya ang mga sakop sa City of Talisay Traffic Operations Development Authority (CT-TODA), nga di na unya pekatan lang sa abusadong mga drayber.

Sa iyang bahin, naglaum si Mandaue City Vice Mayor Carlo Pontico Fortuna nga mas epektibong mapatuman ang ordinansa kon mahinayon ang kauyonan tali sa mga dakbayan sa Metro Cebu ug sa Kapitolyo sa pag-umol og managsamang mga lagda sa trapiko ug paghugpong sa ilang traffic enforcers sa pagpanakop sa masalaypon nga mga motorista.

* * *

[email protected]