Makabentaha ang Mandaue

Nabasa nako sa The Freeman ang isyu kabahin sa paghimo nga bugtong political district sa Dakbayan sa Mandaue, kon hingpit na nga ang Mandaue mabuwag sa 6th Congressional District.

Sa akong pagtimbangtimbang sa isyu, husto baya si Atty. Jamaal James Calipayan, ang chief of staff ni Kongresista Jonas Cortes, nga daku kaayo ang bentaha kon mahimo na nga ‘lone district’ ang Mandaue City.

Karon gud, kon adunay mga mehoras nga alang sa 6th district gikan sa nasudnong kagamhanan, bahinon pa kini sa Mandaue, Cordova ug Consolacion, nga maoy naglangkob sa ikaunom nga distrito.

Kon ang Mandaue City mahimo na nga ‘lone district,’ ang Cordova ug Consolacion magpabilin nga 6th district ug mao na lay magbahin sa financial support gikan sa nasudnong kagamhanan.

Tan-awa, mabulahan pa ang Consolacion ug Cordova, unya ang Mandaue City sab unya, mas molambo pa pag-ayo kay ang financial support sa nasudnong kagamhanan para sa distrito, iya ra man gyud, dili sama karon nga tulo ang magbahin.

Ang kongresista sab unya sa 6th district, makatutok na gyud pag-ayo kon unsay mga balaudnon nga iyang mugnaon aron molambo pag-ayo ang Mandaue.

Ayaw kamo pagtuo nga mosaka ang buhis kon ang Mandaue City mahimo na nga ‘lone district.’

Nakasiguro ko nga dili kini maoy tumong ni Kongresista Jonas Cortes, ang nagsugyot sa House Bill 8511, nga himoong ‘lone district’ ang Mandaue City aron lang pasakaan ang buhis.

Napanglantawan nako nga ang Senate Committee on Local Government nga gipangulohan ni Senador Sonny Angara mopasar usab og counterpart nga balaudnon, nga mosuporta sa Bill ni Kongresista Cortes, aron hiusahon kini ngadto na sa usa ka balaod.

Abi ninyo’g ngano? Wala mosupak sa paghimo nga ‘lone district’ sa Mandaue City ang kadagkoan sa Commission on Elections (Comelec), Department of Budget and Management (DBM) ug ang Department of Interior and Local Government (DILG).

* * *

Karon nga nahibawo na sila nga tinuod gyud diay nga mohatag og tagsa ka sakong bugas-humay ang kagamhanan sa dakbayan sa Sugbo ubos ni Mayor Tomas Osmeña, daghan kaayo ang gusto nga moangkon og bugas.

Atong klarohon nga ang City Hall may lista na daan kon kinsa ang tinuod gyud nga mga drayber og habalhabal ug ang Angkas drivers nga maoy makadawat sa bugas.

Kadto ra nga mga miyembro og kahugpongan sa mga habal-habal.

Ang uban ron moangkon na man nga sila naghabalhabal, apan dili sila sakop og grupo.

Karong Sabado na kuno ang pagpanghatag sa bugas adto sa Plaza Independencia ug magpadayon ang pagpanghatag sulod sa 15 ka adlaw.

Apan timan-i ha?

Kadto ra nga mga taga dakbayan sa Sugbo ug mga botante dinhi sa siyudad.