Plate number releasing dugay

Pebrero 12, 2019, Martes. Wala pay alas 9:00 sa buntag didto na ko sa SM City Seaside aron kuhaon ang bag-ong plate number sa akong sakyanan nga niadto pang Pebrero 2018 narehistro.

Ang produkto sa LTO, serbisyo. Apan makauulaw hunahunaon, nga bisag ang serbisyo gibayaran na daan, unya mopaabot pa ang car owner og usa ka tuig o kapin, ayha pa ma-release ang permanenteng plaka.

Dihang gianunsiyo sa LTO nga ipanghatag na ang hagbay rang gipaabot nga plaka, diin kutob ra Pebrero 16 ang deadline for release, daw hulmigas intawon nga nagpanon ang manguhaay paingon sa Car Plate Number Releasing Office. 

Nagtuo ang tanan nga dali rang makuha ang mga plaka. Apan sa pag-agi pa lang sa unang screening table, mipahibalo na ang in-charge nga andamon ang Certificate of Registration (CR), Official Receipt (OR) ug xerox copy of any valid government ID.

Resulta? Aw, naglumbaanay na sab pagpanganaog ang bagang duot ngadto sa ubos padulong sa National Book Store (NBS) aron magpakopya sa naasoyng rekisitos. Unya kay alas 10:00 pa sa buntag (mao pay pag-abli sa SM), naproblema ang kahera sa NBS kay wala siyay sensilyo nga ikapanukli. Pastilan, langay na pud!

In fairness, buotan kaayo ang mga aninong naglinya niadtong buntaga. Mihatag gyud og prayoridad sa mga senior citizens nga maoy mouna.

Ug suwerte ko, kay maoy gipauna og tunol sa gikinahanglang papeles ngadto sa taga Toyota Cars Corporation nga empleyada, kinsa miingon: “Isulat lang imong cellphone number, Sir, kay teksan lang ka namo kun makit-an na imong plate number.”

“Haaa??? Does it take time?” Nako pa nga mikunot ang agtang.  “Yes, Sir.” Haskang dakoag tando sa babaye. Lalim bay, ang liboan ka plakang didto sa ilang likod naglaundok nga pinutos pag papel, diin sila pa mismo ang motagsatagsa sa pagpangita?

Louya, lagi! Gipaningot gud tawon ‘tong tambok sa pag-inukay.

Usa nila akong gipangutana ngano man ni?  Ug ania iyang tubag: “Si LTO man gud, Sir, wa gyud mohatag og igong higayon nga i-arrange namo daan properly ang mga plaka.”

 LTO Director!  Sir, tinuod ba nga kamo ang hinungdan nganong ang plate releasing, dugay? Please help do something to speed it up!