Mga piniriso buhian na

Kadtong mga nakapalit og four-wheel vehicles gikan kaniadtong Marso 2017 ngadto sa Mayo 2018, giawhag na pagkuha sa mga plate numbers sa ilang sakyanan didto sa Land Transportation Office.

Nangabot na ang mga plate numbers sa 52,120 ka sakyanan nga napalit atol sa maong mga buwan, ug ang mga tag-iya sa sakyanan mahimo na nga mokuha sa ilang mga plaka diha sa LTO sa SM Seaside.

Ang pag-release sa mga plaka sa sakyanan magsugod karong adlawa sulod sa usa ka semana. Busa kamong mga nakapalit og sakyanan sa maong mga buwan, adtoa dayon sa LTO ang inyong mga plaka.

Mibahad si LTO-7 Regional Director Victor Caindec nga human sa gikatakda nga petsa sa pagpanghatag sa plaka, mohimo ang ilang mga sakop uban sa mga LTO deputized policemen sa pagpanakop sa mga tag-iya’g sakyanan nga wala mokuha sa ilang mga plaka.

Anugon unya kaayo ang inyong P5,000 nga ibayad lang sa multa kon madakpan kamo nga nagpadagandagan og sakyanan nga wala itaud ang plaka kay wala man nila kuhaa didto sa LTO.

* * *

Angay’ng daygon si Cebu City Jail Warden Renante Rubio tungod sa paninguha niya nga katabangan aron makagawas pagdali sa bilanggoan kadtong mga piniriso nga mahimong makapahimus sa Probation.

Matud ni Rubio nga kapin sa 1,800 ka piniriso nga natanggong karon sa Cebu City Jail mag-atubang lang og silot nga pagkabilanggo nga dili molabaw sa unom ka tuig kon sila makonbikto.

Ubos sa balaod, kadtong mga nakombikto sa mga ginagmay’ng kaso sa unang higayon, makahimo pag-avail og Probation, basta ang ilang silot nga pagkabilanggo wala molapas sa unom ka tuig. Nagpasabot kini nga tabangan sila sa Parole and Probation Administration nga makagawas sila sa prisohan ug mo-report lang sila matag karon ug unya, didto sa ilang mga Probation Officer.

Apan atong klaruhon nga kinahanglan nga makombikto usa ang maong mga piniriso. Sa ato pa, kun nakahimo man gyud sila og salaod, mahimong moangkon na lang sila ubos sa Plea Bargaining Agreement.

Ang kanihit sa mga kawani sa Department of Health nga mohimo og assessment sa mga binilanggo, maoy nakapahinay sa pagpagawas sa mga piniriso nga mo-avail og Probation.

Nakahunahuna si Rubio nga patudloan niya ang 10 niya ka sakop kun unsaon paghimo og assessment, ug mohimo sila og rekomendasyon ngadto sa korte.

Duna na’y siyam ka binilanggo nga nakagawas ug kapin na sa 400 ka piniriso nga ilang girekomendar sa hukmanan nga mahatagan og Probation.

Salamat kaayo City Jail warden Rubio sa pagtabang nimo sa mga piniriso nga makagawas na sila sa bilanggoan ug magbag-o sa ilang kinabuhi.