Magtinabangay, dili mag-iyahay!

Sunod- sunod nga sunog ang nahitabo sa Dakbayan sa Sugbo ug anaa usab didto sa Dakbayan sa Talisay.

Apan ang mas dako mao ang sunog sa Barangay Ermita ning syudad sa Sugbo diin tulo ka sitio ang naapektohan.

Dugay napalong ang kalayo tungod usab sa mga factor sama sa kahuot sa agianan diin natanggong ang mga fire trucks.

Nakasulod man tuod apan wala na makagawas dihang nahutdan og tubig, gawas pa napun-an ang problema sa kahuot sa dalan diin giparkingan sa mga motor ug naa usay gihimo nga mga tindahan.

Ang hinungdan sab nga kumon kaayo sama sa giingong bata nga nagdula og posporo, hinoon subject for validation kini.

Pangutana lang nako nganong dili man mapalong dayon ang kalayo nga unta gamay pa man kini?

Ang nahitabo gud ang mga tawo mag-iyahay naman sa pagpanagan o maningkamot nga manghakot sa mga butang.

Segurista kaayo ang mga tawo nga gustong masalbar ang angayan nga luwason nga kabtangan apan ang resulta ugdaw gyud ang tanan.

Unta sa pagsugod pa lang sa sunog magtinabangay ang mga tawo sa pagpalong sa kalayo.

Pareha bitaw sa maghaling nga unang huyopan aron modako ang kalayo ug ini’g kinahanglan nga pagngon dali ra kaayo kay kontrolado man.

Imbes mag-iyahay ang mga tawo, magtinabangay gyud unta aron mapugngan hangtod mapatay ang kalayo.

Labaw sa tanan mas maayong mag-amping gyud aron malikay sa ingon niini nga katalagman.

Sa usa ka sipyat lang mahimong maabo ang tanan nga hinagoan.