EDITORYAL - Seryuso ba gyud?

Ang Dakbayan sa Sugbo gikatakdang mopahigayon og mga river cleanup drives karong bulan sa Pebrero ug Marso aron limpyohan ug habwaan sa mga basura ang tulo ka mga dagkong sapa niini nga mao ang Guadalupe River, Lahug River ug Bulacao River.

Nunot sa kadako sa trabahoon ang Cebu City Environment and Natural Resources Office (CENRO) nanawagan sa publiko ilabi na sa kadaiyang mga organisasyon sa katilingban nga moboluntaryo pagtabang sa maong kalihokan.

Ang river cleanup himuon karong Pebrero 23 diha sa 11 ka kilometrong Bulacao River. Sunod ang Lahug River apil na ang sa Tejero Creek, Tinago Creek ug T. Padilla Creek nga himuon Marso 9. Ang sunod nga limpyohan mao ang Guadalupe River sa Marso 16.

Nindot kaayo kini nga kalihokan kun magpadayon hangtud sa hangtud. Apan ang pangutana seryuso ba kaha ni nga kampanya? Kay kun buot hunahunaon dili paigo ang usa lang ka adlaw nga pagpanglimpyo sa usa ka sapa.  Malimpyo ba gyud kini og tarong ana lang adlawa?

Dali ra kaayong makakuha og volunteers apan dili sila kadtong volunteers nga molahutay pagubog sa hugaw kaayong tubig sa mga sapa dinhi sa siyudad. Angay sab hunahunaon daan nga kaning mga volunteers makatabang man tuod apan motabang lang sila gikan sayo sa buntag kutob alas-10 sa buntag kay ang uban dili na makasugakod sa kainit ug mamauli na.

Ang uban “for compliance” lang kay tingali gi-require sa eskuylahan o kompanya. Samtang ang uban motunga lang apan dili mamunit sa basura kay hadlok mahugawan ilang gisuot. Dunay uban barkada ug selfie-selfie lang maoy tuyo ug dili ang tinud-anay nga pagmahal sa kalikopan.

Kung seryuso ang CCENRO mas labing maayo nga pamultahon diretso ang barangay  kay hugaw ang sapa sa ilang hurisdiksyon. Pamultahon sila ug ubang pataka og labay og basura subay sa balaod bahala og kaalyado o dili sa administrasyon. Aning paagiha gamay ray gastos ug mao pay makakolekta og multa.