Pasidungog ni Edgar
Niretiro na ang bantogang magsisibya sa Sugbo nga si Edgar Gutierrez sa pagduma sa iyang mga tulomanon sa DYAB Abante Pa, Bisaya! ug busa puno sa kahinugon ming nanamilit niya atol sa Arangkada niadtong Biyernes.
Nagplano gyud unta og pormal nga pasidungog ni Edgar silang ABS-CBN Cebu Station Manager Leilani Salem Alba ug DYAB News Chief June Perez atol sa tulomanon nilang Edgar ug Jennyrica Vidad nga Pabuhagay, apan nibalibad si Edgar. Kinsa nipalta na sukad niadtong Martes kay nangandam na sa sunod nga hugna sa iyang kinabuhi.
* * *
Dihang gipahibawo ko sa plano nga mangimbitar sa labing suod nga mga higala ug mga sakop sa pamilya ni Edgar ug mag-andam og pagkaon alang sa surpresa nga pasidungog, akong giingnan si June nga tingalig silay makugang kun di motunga si Edgar.
Tuod man, nibalibad si Edgar dihang among gihangyo nga motambong. Kay hilasan nga dayegon ug pasidunggan. Mao nay iyang sulti. Apan nitug-an nako ang iyang bugtong anak nga si Angelie nga sukad pa sa una nga naglikay si Edgar sa tanang kahigayonan nga mabantang sa kadaghanan ang iyang emosyon.
* * *
Usa sa talagsaong kausaban nga gihimo ni Edgar human sa lima ka dekada nang pagpanibya mao ang paggakos sa bag-ong mga teknolohiya sa komunikasyon. Ang ilang mga drama ni Jenny naggamit na sa labing bag-ong apps sa YouTube ug Spotify alang sa musika ug sound effects.
Mao nga among gidapit ang among kaubanang magsisibya ug suking mga tigpaminaw sa pagpadangat sa ilang pasalamat ug pasidungog ni Edgar ginamit ang FB Messenger, Viber, WhatsApp ug GMail.
* * *
Kay sa bay ra man ko nagsibya tungod sa kakulian sa kahimsog sa akong asawang si Iris, akong gisumpay ang voice messages pinaagi sa among nahibaw-ang kinaham niyang mga awit ug gi-share ang recording sa DYAB pinaagi sa Google Drive. Hinaot nga wa mi magpaka-uwaw ni Edgar sa dinalidaling produksiyon.
Kay daghan pa mang nangabot nga mga pasidungog human sa sibya, nagplano ming i-upload ang kapin sa oras nga pasidungog sa YouTube ug Facebook sa pamasin nga madunggan di lang ni Edgar (nga mahimong nagdumili pagpaminaw sa sibya) kun dili sa mga batan-on ug umaabot nga henerasyon sab.
- Latest
