Tommy gidayeg sa kontra

Mangayo diay ko’g pasaylo kay may nag-email man diay nako ug wala dayon nako mabasa.

Nagkomentaryo siya sa atong lindog nga natuki dinhi sa Renbor Patrol taudtaud na nga higayon.

“Mga nindot ang programa ni Dr. Paulus Cañete nga maningkamot siya nga matukoran og provincial hospital ang Cordova ug Consolacion, ingon man public college kon modaog siya pagka provincial board member sa 6th district.”

“Nindot sab ang iyang plano nga sea ambulance nga magamit sa nga nagpuyo sa kaislahan diha sa Cordova ug Lapu-Lapu aron kasakyan paghatud kanila sa ospital.”

Usbon nako, sori kaayo Dolores Amistad sa wala dayon nako pag-atiman sa imong gipadala nga komentaryo.

* * *

Usa ka alyado ni kanhi mayor Michael Rama nakadayeg kaayo sa pamaagi karon sa pagpanghatag og cash assistance sa mga namatyan ug sa mga nasunogan.

Dili lang hinoon nako ilhon ang maong alyado sa Team Rama/Barug PDP kay sigurado gyud nga yam-iran siya sa iyang mga kauban, ug posible pa nga panghimaraoton.

Ang gipasabot niya mao nga kaniadto panahon sa termino ni Rama nga mao pa ang mayor, papundokon ug pahuwaton gyud ug pila ka oras ang mokuha sa mga cash assistance.

Ang uban mangabot na alas nuybe sa buntag ug alauna sa hapon na mahatagan sa ilang mga tseke ug daghan kanila gipanggutom na.

Ang rason kay si Rama man gyud maoy motunol sa tseke human kini makadiskurso atubangan sa mga beneficiaries. Wala sab diay makagusto niadtong maong paagi ang alyado ni Rama nga anaa pa gihapon karon sa City Hall.

Bitaw, husto gyud kaayo ang gihimo ni Mayor Tomas Osmeña nga ipiyal ra sa iyang mga tawo ang pagpanghatag sa mga tseke ug dili na kinahanglan nga ang mayor pa gyud ang motunol.

Niining bahina, nakapuntos si Tommy. Nakabantay ko nga apil sa pagpanghatag og cash assistance sa mga senior citizens, sama karong adlawa, dili na mag-apil-apil pa si Mayor Osmeña.

Husto gyud kaayo kay total, nakahibawo man ang mga tawo kun kinsa ang mayor.

* * *

Nakadayeg ko sa sitwasyon sa politika dinhi sa dakbayan sa Sugbo kay hangtud karon, nagpabilin nga malinawon ug ang nagkaatbang nga kandidato, iya-iya lang og pangampanya nga walay pagpanaot. Aw, naa hinoou binilyako sama sa pagpanaptap sa mga propaganda materials.

Dunay mga posters sa akong amigo nga si Konsehal Jun Gabuya sa south district nga gipangtapan sa posters ni kanhi mayor Rama. Kini dili na sab maayo. Nasiguro hinoon ko nga wala magsugo si Rama niini pero ang iyang mga supporters maoy naghimo.

Kun maghimo mo og mga tinonto, ang mga botante maluoy hinoon sa giabusohan ug dili hinuon malimot kang Gabuya atol sa eleksiyon.