Naapil ta sa kahasol

Angay kita nga malipay kay daghang proyektong inprastraktura para sa siyudad sa Sugbo wa maapektohi sa election ban sa pagpatuman og mga proyekto.

Matud ni Cebu City Councilor Jerry Guardo, ang deputy mayor for infrastructure, nga ang P40 milyones nga mga proyekto ipatuman na sa dili madugay sa mga barangay Banilad, Lahug, Kamputhaw, Sambag 1, Sambag 2 ug Ermita.

Ang Cebu City Council mihatag na og pagtugot ni Mayor Tomas Osmeña nga makigpirmahay og kontrata sa mga kontraktor niining maong mga proyekto.

* * *

Nindot baya kining gisugyot nga ordinansahon ni Cebu City Councilor Eugenio Gabuya Jr. nga idili na gyud ang paggamit og mga plastik nga sudlanan sa tubig, juice ug pagkaon nga gamiton atol sa mga lumba sa dagan dinhi sa dakbayan.

Nakabantay man gud si Konsehal Gabuya nga sagad gyud sa mga ipahigayong fun runs, marathon ug triatlon, ug ubang kalihokan diha sa mga karsada, mogamit gyud og mga plastic nga sudlanan sa pagkaon ug mainom.

Human og inom o kaha kaon sa sulod niini, gaan kaayo ang mga kamot sa katawhan nga moitsa ra dayon sa ilang mga plastik diha sa karsada o kaha sa palibot.

Mao nga mosuporta gyud ko niining ordinansahon ni Konsehal Gabuya kay nindot gyud kaayo ang tumong niini.

Unta, dili kini supakon sa mga konsehal ug hinoon angay nila kini nga suportahan ug himoon nga usa ka balaod.

* * *

Dili imposible nga ang ubang tighipos sa mga basura gikan sa mga ospital, wala na motuman sa balaod ug ang mga hazardous waste, ilabay ra nila ipon sa mga ordinaryong basura.

Mao kini nga karong Enero 30, ang City Council sa dakbayan sa Sugbo magpahigayon og executive session aron nga matuki kining kabalaka ni Konsehal Garganera.

Pastilan, didto ra gyud ni magsugod sa Mandaue City kay ang gi-hire nga tighipos sa mga basura sa usa ka ospital wala man diay motarong sa paghipos sa mga hazardous wastes.

Ambot ngano kaha nga ang kagamhanan sa Mandaue ubos ni Mayor Luigi Quisumbing miisyu man og provisional mayor’s permit sa maong tighakot og basura alang sa iyang negosyo nga wala man unta kini makatuman sa mga gilatid sa DENR-Environmental Management Bureau.

Mora’g natayo-tayo na man lang hinoon. Importante kaayo ang clearance gikan sa DENR-EMB ug kay wala man sila makakuha niini, sayop ang gihimo ni Mayor Quisumbing nga gitugotan gihapon niya nga maka-operate ang maong kompaniya. Tan-awa, ang mga hazardous waste diha ra kuno gitam-ok sa Butuanon river ug nabanlas sa dagat.

Maayo unta og wana ni mahitabo dinhi sa dakbayan sa Sugbo.