Milagro sa panahon
Di kaha maayo nga sa sunod nga agpas sa PAGASA sa kahimtang sa panahon sa Piyesta Senyor sa Sugbo i-apil nang kahigayonan nga manginlabot si Senyor Sto. Nino? Di ni unang higayon nga nasayop ang mga pangagpas sa PAGASA.
Apan mas nabantang lang sa nangagi nga mga adlaw kay mas daghan ang nakahibawo ug nabalaka sa gisubli-subli nilang pasidaan nga mahimong bagyuhon ang labing dagkong kalihokan sa piyesta.
Ang uwan dayong udtong tutok gahapon dihang nakabuylo nang street dancing sa Sinulog Grand Parade nauwahi og usa ug tunga ka adlaw.
* * *
Tungod sa detalyado na kaayo nga banabana sa pagkahimong bagyo nga “Amang” sa low pressure area (LPA) inig sud sa Philippine Area of Responsibility (PAR) niadto pang Biyernes sa hapon, nangandam nang Philippine Coast Guard (PCG) sa pagkanselar sa fluvial procession ug gipangitaan na sab og lutsanan ang posibleng pagbaha sa pipila ka bahin sa ruta sa solemn procession.
Maong nanlipaghong sa kauwaw ang PAGASA ug nakaangkon og sukaranan ang mga namikat nila dihang labihang linawa sa dagat niadtong Sabado sa buntag ug labihang sigaha sa adlaw niadtong Sabado sa hapon.
* * *
Bisan si Cebu Archbishop Jose Palma wa kapugong pag-apil sa forecast sa PAGASA sa iyang wali sa Misa Pontifical sa Pilgrim Center sa Basilica Minore del Sto. Niño.
Labihang pakpak sa kaliboan ka deboto pagpasalamat ni Senyor Sto. Niño sa maayong kahimtang sa panahon bisan sa sukwahi nga mga pangagpas.
Nikumpisal ang mga eksperto sa PAGASA nga ang direksiyon sa LPA o bagyo mag-agad sa gikusgon sa bira o duso sa bugnaw ug init nga hangin.
Wa maapil sa ilang weather models ang papel sa mas misteryusong puwersa.
* * *
Dihang giisa sa PAGASA ang Signal No. 1 sa mga naigo ni “Amang,” ang pasalamat sa mga deboto gikan sa kasilinganang mga isla gipulihan og kahingawa.
Natanggong sila kay wa kapauli human gigakotan sa PCG ang mga barko gikan ug padung sa Sugbo ug ubang pantalan sa Kabisay-an ug Mindanao.
Labaw sa maayong kahimtang sa panahon, ang pagsungasong sa mga deboto sa daghang kakulian, nga labaw pa sa mga sipyat sa PAGASA ug aktuwal nga uwan, baha ug bagyo, maoy labing matahom nga milagro. Matag tuig.
* * *
- Latest
