Matugnaw man ang hangin

Kaadlawon. Gibati ko ang tumang katugnaw. Buot kong pangitaon ang kainit aron mamahimong tunhay ang katulogon.

Apan ang ubo padayong mihasol kanako ug wala mohatag kanako og igong panahon aron makapahuway. Mao nga wa koy laing nahimo gawas sa pagtutok sa kisame aron aninawon kun may mga tiki bang nagpilit niini.

Tigulang na gyud ko mao nga tingali ang kaadlawon pahinumdom aron sa Diosnong Arkitekto ako makigkukabildo.  Kini aron suhiron ko ang mga detalye sa desinyo Niya nga iyang gihatag kanako.

Kini ang kinabuhi ko. Siya ang naghatag ug siya ang mobawi niini. Ang  mahinungdanon mao nga akong tagsa tagsaon ang detalye kun giunsa man kini nako paghubad.

Basin ako lang ang nakasabot apan ang uban wala. Ug kay wala man nila hisabti mao nga usa na lamang ka dakong duhiraw ang kalambigitan.

Imbis magdala ug tunhaw nga katagbaw magdala man nuon urom sa dakong kabuntagon. Ang hangin nga midapat tugnaw.

Sama katugnaw sa panlantaw ug gilantaw. Daw sa nahimong idlas ang kabuntagon sa gipangandoy nga tingusbawan. Apan salamat sa maong kasinatian, nakaamgo ako nga diha diay sa atong kalisdanan mahimong mahimugso ang mamugnaong panghunahuna.