EDITORYAL - Seguridad sa publiko o seguridad sa nasud?

Ang seguridad ug kaluwasan sa publiko dili mahimong ikabaylo. May daghang pamaagi pinaagi sa modernong teknolohiya aron mamenus-menusan ang mga dautang mga panghitabo nga mahimong gamiton.

Ang administrasyong Duterte pinaagi sa Department of the Interior and Local Government ug China International Telecommunications and Construction Corp. nipirma og P20 Bilyones nga kontrata  aron pagmuntar og close-circuit television cameras sa kadalanan.

Ang maong kontrata magmuntar og 12 mil ka mga surveillance cameras sa kadalanan sa Metro Manila ug Davao City. Hinuon kini nga gidaghanon dili paigo aron malukop og bantay ang tibuok nasud apan di magdugay maabot kini sa Cebu.

Samtang maayo ang tumong niini, apan dili ikalimod nga may motumaw nga kabalaka dili tungod kay sila taga oposisyon kondili tungod sa kung asa gikan ang maong mga surveillance cameras nga mao ang China.

Samtang wala pa man tuod maaprubahi sa Ubos Balaybalauranan ang budget para niini apan dako ang posibilidad nga kini maaprubahan kay mayoriya sa mga kongresista kaalyado sa administrasyon.

Ang pundo para niini kuhaon gikan sa giingong “unprogrammed funds” nga mokabat P96 billion sa 2019 budget nga hangtud karon wala pa maaprubahi sa kongreso.

Angay tingaling paminawon sa ubang mga kongresista ang sentimiyento ni Rep. Gary Alejano (Magdalo Party-list) nga nipadayag og kabalaka nga mabutang sa peligro ang national security tungod niini ilabi na nga nabantog ang China sa pangispiya.

Bisan unsaon pa og pamugos sa administrasyong Duterte nga dawaton sa mga Pilipino ang mga Chinese dili na niya mausab pa ang kinaiyang maoy namathan sa mga tawo bahin kanila.

Sa mga nahitabo karon sa West Philippine Sea nga gikasagmuyo sa kadaghanan sa mga Pilipino nunot sa daw paghatag og katungod sa China nga abusohon ang mga teritoryong iya unta sa mga Pilipino kinahanglang hinuklogan sa mga magbabalaod kun tinud-anay ang ilang pagbati alang sa proteksyon sa nasud.