Indikasyon sa senyales sa problemadong ilok (1)

Labihan na kapaspas karon ang lihok sa atong panahon, nga gikinahanglan moduyog usab kita niini basig maiwit sa pagsikaysikay nga palambuon ang mga pangandoy nato aron sa pag-umol og kinabuhi nga hamugaway.

Tungod ini ang ubang mga tawo, inanay na nga nataligam-an, wala na kahatagig prayoridad nga masustenihan ang pag-atiman sa maayong panglawas. Nalimtan ang kabililhon ini nga maoy importante nga puhonan o kusog nga mopalahutay sa atong pakigbisog.

Bastante na kaayo tang kompiyansa sa pagmatikod sa parte sa atong lawas, sa way pagtagad nga pamation ang mga senyales nga makompromiso ang kahimsog. Sa unsa man nga kaso dili nato ni angay ipagamay, sama sa problema sa ilok.

* Ang baho – mahimo nga wa kita makabantay sa baho sa atong ilok, nga morag langtu (asidik) nga makalisngag ug makalipong. Posible nga resulta kini sa toksik nga organismo nga nadebelop ug nisagol sa singot.

Kon bag-ohay lang napanimaohan, dili angay mabalaka kay madala rag hugas ighuman pahiran og ‘anti-persperant’, obserbahe lang maoy gamiton kanang dili ka maalergy o mangatol.

Hinuon, kon di gyud mawala nga magkagrabe ang kaisog sa baho, indikasyon na ni sa potensyal nga problemang medikal.

Nga bisag unsaon og limpyo, senyales na kini sa isyu sa  ‘hormonal imbalance’ ug sa thyroid. Kon ang baho susama na sa nadugta nga produkto, senyales sab ni sa ‘ketoacidosis’, nga ang lawas wala nay katakos pagproseso sa asukar.

* Pangatol (itching) ug Paminhod – Sa gihapon ang kahasol sa dapit sa ilok, natural kini gumikan kay nanubo pagbalik ang balhibo sa ilok nga gibarbasan. Apan kun pabilin ang iritasyon ini, senyales ni nga dunay kakulian ilawom sa lawas.