EDITORYAL - Patas-anay og ihi

Duna pay gamay nga tsansa nga makab-ot ang kalinaw tali sa gobiyerno ug mga rebeldeng komunista. Kini kun tuohan ang pamahayag sa pangulo niadtong nakalabay nga Biyernes nga giablihan niya og gamay ang pultahan para sa peacetalks.

Ang chief negotiator sa National Democratic Front nga si Fidel Agcaoili nihangop niini apan may pakapin pang panglabtik pinaagi sa pag-ingon nga dili ang ilang kampo ang niputol sa peacetalks kondili ang gobiyerno.

Ang ingon niini nga klase sa mga pamahayag mao rason kun nganong makadaghang higayon nga napalpak ang mga peace negotiations kaniadto.

Ang  matag kampo parehong mga hilas mapakaaron-ingnon nga maoy sakto. Way gustong moangkon sa sayop nga maoy nakaingon sa kapakyasan sa mga peacetalks. Sama ra sila og nagpatas-anay og ihi.  Apan silang duha parehong abtik kaayong mamasangil. Kun ingon niini kanunay ang dagan sa hunahuna sa duha ka kampo, nagusik-usik lang sila sa ilang panahon.

Samtang nagsige sila og lalis kun kinsa ang sayop nagkataas usab ang listahan sa mga pangalan sa mga nakalas.

Milyones na nga kantidad sa ekonomiya ang nausik tungod niining pila na ka dekadang giyera nga gisugdan pa sa panahon sa Hukbalahap.

Samtang tuod husto si Duterte, bisan og unsaon pa sa mga rebeldeng komunista dili ug dili gyud sila molampos pagpalagpot sa kasamtangang gobiyerno ug sa mosunod pang mga administrasyon dinhi sa nasud. Apan wala gihapoy kapuslanan kay magsige man og kasamok.

Sa pikas bahin, hangtud nga di makumbinsir sa mga komunista ang kinabag-an sa mga Pilipino sa ilang idolohiya walay padulngan ang ilang pakiggubat.

Kun ang tumong mao ang pagpukaw sa gobiyerno aron atimanon ang ilang mga nakitang kasaypanan, inhustisya ug kakulangon, nganong di nalang sila motabang sa malinawong pamaagi? Gawas nalang tingali kun lahi ang ilang tumong.