Sakit undangon ang naandan

Mausabon ang panahon. Kun unsa ang  pirme gihimo sa nangagi, basig karon dili na. Ug kun unsa man ang puwede ugma, basin sa sunod ugma, lain na pud.

Tungod kay ning kalibotan, wala gyuy forever.

Hunahunaa lang, sa 1960’s ang sidsid sa mga sinina sa babaye, lapas gyud sa tuhod paubos. Karon, kita nang kigol!

The world evolves. Time changes. Kun sa nangaging pangulo sa Pilipinas ginadiling drugas mibaha, ning administrayong Duterte, gipahubas!

Ingon ini sab karon ang sitwasyon sa tag-iyag Public Utility Bus ug kapasaheroan sa mga lagyong probinsiya o kalungsoran ning atong siyudad, kinsa grabeng igoa ning NO STANDING POLICY nga gitira sa LTFRB ngadto nila ug nato mismong mobiyahe’g lagyo.

Kanhi sa estudyante pa ko, nasinati nako ang panagdasok sa pasahero gikan sa amoa hangtod na sa siyudad (matag Lunes) ug gikan siyudad ngadto sa among lungsod (kada Sabado).

Hasta pultahan sa bus, nagsinardinas ang nagbarog.

Maglugos gud pag-agi ang konduktor.

Apan kuntento man gihapon mga pasahero. Kay ang importante, dili ma-late sa trabaho o sa pag-eskuyla.

Ganahan sab ang tag-iya sa bus ug ang drayber. Kay ang ilang kita dinagko.

Labi nag ang suweldo sa drayber gibase sa unsa kadaghan ang iyang mapasahero kada adlaw.

Busa, ning hugtanong pagpatuman sa LTFRB sa NO STANDING POLICY, tanan naapektohan: ang tag-iya sa bus, drayber ug pasahero.

Kay ning gihimo sa LTFRB, sama ra, nga sila, kinsa kaniadto, daw mga pinatuyangang bata sa pagpakaon og candies and chocolates nga kanila nakalipay, karon hingpit nang gihikawan sa LTFRB.

Hinuon, sa NO STANDING POLICY, matagamtaman sa pasahero ang kakomportable sa pagbiyahe.

Kana kun wala magdali, o kun matag pipila ka gutlo nga molabay, may bakanteng bus nga kasakyan. Unya’g wala?

Then,  ang pasahero nagdali, pasagdan ba lang magkadaghan ilang tapok nga dili makasakay?

Timan-i, LTFRB, time is gold.

Time is running by. Unya,  bisan ang miabot on time sa pagbiyahe, wala pasakya? Dili mo maluoy, no?

Okay lang unta, kun ang gobiyerno makahatag og dugang passengers bus nga ning maong concern makasulbad.

Perog dili? Aw, magbagulbol gyud ang Tingog sa Katawhan.

Kay makagisi gayod sa kasingkasing, kon kalit lang undangon ang unsay naandan.