Inahan sa tinuoray’ng panabang

Haskang lisora alang sa mga biktima sa pagpangabuso sud sa mga panimay.

Bisan sa balaod nga nagsilot sa pagpanagmal sa kababayen-an ug kabataan, kasagaran sa mga asawa ug mga anak mapugos og luom sa pangabuso nga ilang nahiagoman.

Kun modangop sa kapolisan, ipasa sila sa mga barangay. Kansang mga opisyal modasig sa paghilot sa panagsungi gawas lang kun nakahukom nang asawa nga makigbuwag.

Apan kay bana may nagbuhi sa pamilya, mapugos ang asawa ug mga anak pagdawat sa areglo. Hangtod sa sunod nga pagpangulata. Nga mahimong mas bangis kay sa nangagi.

* * *

Madasig lang ang mga biktima sa pagbarug sa ilang mga katungod kun duna silay kadangpan.

Asa man sila mopasilong kun mangisog sa pagpasaka og kaso batok sa padre de pamilya nga nangabuso nila?

Kinsa may mopa-eskuyla sa mga bata? Kinsa may mopakaon nila?

Lisod ning problemaha. Di mada sa usa lang ka buhatan sa kagamhanan.

Gikinahanglan ang pagtinabangay sa nagkalainlaing mga buhatan sa kagamhanan ug nagpakabana nga kahugpongan sa pribadong sektor.

Tungod sa nagbuntaog nga tahas, kasagaran sa hingtungdang mga opisyal sa gobyerno mopili na lang sa paglingiw.

* * *

Apan wa motalaw si Bise Gobernador Agnes Magpale. Ang determinasyon sa pagpanalipod sa kababayen-an ug kabataan, nga nagsugod isip personal nga kawsa, nakapalahutay niya sa pakiglambigit sa mga buhatan sa gobiyerno ug non-government organizations aron katabangan ang mas daghan ug mahimong mas lapad ug mas malungtaron ang pagpanalipod nila.

Human naumol ang Provincial Women’s Commission (1999), Women Development Code (2005) ug Children’s Code (2005), napabarug niya ang Cebu Provincial Women and Children Development Center (2016) ug napalapdan ang scholarships alang sa mga batang biktima sa pangabuso ug katimawa.

* * *

Tungod sa paghangop ni Gobernador Junjun Davide sa mga sugyot ni Magpale, natudloan og alternatibong mga panginabuhi ang kababayen-an ug nahatagan ang mga batan-on sa tukmang mga pagbansay-bansay paghimo nilang umaabot nga mga lider sa nasud.

Ug kay may ikapakita na mang labok ang Kapitolyo, di na magpangikog si Magpale sa pagpatabang sa NGOs sa pagsagop sa ubang mga biktima sa pangabuso. Sama nga nadasig sab ang manggihatagon nga mga Sugbuanon sa pagtampo aron mahimong mas sayon ug makahuloganon ang bag-ong kinabuhi sa mga biktima.

* * *

[email protected]