Life begins at 40

Hapit na ang adlaw diin nahimong sugdan ko na usab ang laing hugna sa akong panaw. Kap-atan n aka tuig ang nilabay. Nahimugso ako apan sa pusod natitanus. Nagtuo nga ako mamatay apan hangtud karon buhi lang gihapon.

Ang 40 simbolo sa paglimpiyo ug pagbanlas sa bisan unsang dili maayo. Tawag sa panaw padulong sa kamingawan sa akong pagkatawo.

Tawag sa paghilom ug pagsubay sa bag-ong dalan agig pagpangandam sa katapusang hunat sa akong panaw ning walog nga luhaan.

Dili man tuod mahimong hingpit ang tanan apan namasin ako nga human sa lunop nga nahiagoman makita ko ang kahayag nga gikahinaman. Enero 7 ang adlaw kong natawhan ug nahimong kabahin na sa akong kinabuhi ang maong numero.

Sa akong pagluhod atubangan gambalay sa kahingpitan nakita ko nga walay hingpit nga angayang ipangindahay. Ang tanan dunay kakulangan. Ug angay kitang makontento na lang niini kaysa magpangita sa hingpit nga usa ka dakong lit-ag aron mabuhi nga malinawon ug balansi.

Giukab ko ang akong mga libro ingon man ang thesis nga akong gihimo kaniadto. Wala koy laing nalitok gawas sa pulong sa pasalamat. Pasalamat dili tungod kay buhi pa ko karon.

Pasalamat kay nahigmata ko sa matuod nga tinuod gyud diay ang kamatayon mao nga matag adlaw bililhon aron diha sa akong pag-atubang sa akong Magbubuhat masuwat o matagik ko unta ang katapusang script sa akong mga damgo ug mahatagan kini og kinabuhi sa akong inadlaw nga panlimbasog.