Dili na gugma ang grabeng kasuko

Kinaiya sa inahan nga mopangga sa iyang anak. Sa higayon nga may mud-on ang bata, mahingawa sab siya.

Kun unsay bation sa bata, mokonektar kini sa kasingkasing sa inahan sanglit gikan sa kama sa romansa ngadto sa katre sa maternity, siyam man ka bulan nga nahimong kabahin sulod sa  iyang lawas ang bunga sa pagminahalay nga giluyong sa iyang bana  didto sa tabunok niyang sabakan.

Sa bata pa ko, sa higayon nga hilantan ko, haskang grabeha makabuhos sa akong Nanay sa iyang dakong gugma ngari nako. Iya akong kugoskugoson, duyanon sa iyang bukton, hagkan ug alam-alaman: “Inom og tambal, Dong, kay buotan man.  Niay tru-orange, oh! Inom aron mamaayo dayon.”

Haskang lamia imnon sa tru-orange. Gikalipay ko ang maong matang sa pag-amuma. Kay kadtong akong Nanay, kusog sab ‘tong molatos kun makasala ko. Nasabyagan man gani ko’g una sa ginamos. Unsaon, mitubagtubag-nangatarongan man ko dihang iyang gikasab-an.

Hinuon, nakasabot ko nganong gibunalan kong Nanay. Kini tungod sa iyang dakong gugma nako. Dili siya gusto nga mosimang ko sa hiwing dalan sa kinabuhi.

Hapdos lang gyud ang sanga sa bayabas nga naupos sa pagbinunal niya sa nanghapdos kong sampot. Pero’g panahon nga hilantan ko, ay sus, mura pud ko’g prinsipe nga iyang ludhan, uy! Pwerte gyung pakiluoy nga tomaron ko ang tambal. Didto akong nasinati ang matuod nga gugma sa usa ka inahan.

Pero, niining pipila ka adlaw’ng milabay, nakurat ko dihang nagbansiwag sa pamantalaan ang balita nga may inahan kunong mipatay sa kaugalingon niyang 6 anyos nga anak, kinsa nahinaykan pagbun-og kay wala moinom og tambal sa hilanat. Nagkayokayo ang kasuko sa inahan kay gahi gyud kuno patomarog medisina ang bata. Mao nga tungod sa nag-umidong kalagot, imbes alam-alaman ang anak aron moinom og tambal, gikastigo hinuon taman sa ginhawa nga miresulta sa wala damhang kamatayon. Pastilan, no?

Dinhi, nakaingong ko, nga  wala gyuy ayo ang pagbaton og grabeng kasuko sa anak. Sanglit ang kasuko iyaha man sa yawa. Ug oras nga sakyan ni Satanas ang kainit sa imong kasuko, maugdaw sab sa hingpit ang gugma nimo sa imong minahal. Hinaot unta, nga kapanaminan kining hitaboa sa mga inahan.