Padayon ang paglambo

Ania na kita sa Bag-ong Tuig. Ambot kun unsa ang atong mapaabot niining 2019. Sa nakalabay nga tuig puno sa mga yangungo  ang mayoriya sa katawhan gumikan kay halos walay undang sa pagsaka sa nag-unang palaliton tungod sa implementasyon sa TRAIN law.

Apan sa akong pangagpas, mas maayo usab ang dagan sa ekonomiya sa nasud karong tuiga.

Adunay mga palisiya ang administrasyong Duterte nga padayong makadani og mga langyaw nga mamumuhonan.

Kini bisan pa man sa nagkagusbat nga imahe sa kahusay ug kalinaw sa nasud nunot niining dakong gubat batok sa ilegal nga drugas.

Gani, gipaabot nga mas daghan usab nga mga turista ang modagsa sa Pilipinas karong tuiga kay sa niaging tuig.

Hinuon, sa war on drugs sa administrasyong Duterte, akong nakita nga padayong kining maglagiting karong tuiga.

Sama sa niaging tuig, daghan gihapong kinabuhi ang mapitlok gumikan lagi kay dili gayud sila mobiya sa ilang pagkalambigit sa ilegal nga druga.

Dinhi sa Sugbo, morag ang trapiko maoy nag-unang problema sa mga Sugboanon karong tuiga. Mas gitagnang mosamot pa ang kahuot sa atong mga karsada gumikan sa nagkadaghan nga mga sakyanan dinhi sa Metro Cebu.   

Hinuon aduna nay mga infrastructure projects ang gisugdan na ug gika-scheduled nga sugdan sa pag-implementar.

Apan pipila ka tuig pa una nato kini mapahimuslan. Sa pagkakaron, pabilin ang dakong maldisyon nga atong gipas-an nunot niining problema sa trapiko.

Sa natad sa turismo, daghang langyaw ug lokal nga mga turisma ang gipaabot nga modagsa sa Sugbo.

Kun baga nga duot sa mga turista ang mibisita sa Sugbo sa niaging tuig, mas labing daghan ang moabot karong tuiga, ilabina nga aduna na kitay moderno nga internasyonal nga tugpahanan.

Sa akong tan-aw, maayo sa kinatibuk-an ang dagan karong tuiga alang sa Pilipinas.

Dinhi sa Sugbo, akong nakita ang padayon nga pagdagayday sa mga puhonan, ilabina sa natad sa business process outsourcing.

Tungod kay daghan ug maayo ang kalidad sa labor force dinhi, paborito gihapon ang Sugbo nga destinasyon sa mga langyaw’ng magpapatigayon. Sa kinatibuk-an, padayon ang paglambo sa lokal nga ekonomiya.